И.Метшин: «Бөтен МУПларны базар икътисады рельсларына үзгәртеп корырга ярамый, ул чагында алар табыш турында гына уйлаячак»

Казан территориясендә бюджеттан финанслана торган 646 муниципаль учреждение эшли.

(Казан шәһәре KZN.RU, 13-нче июль, Алена Мирошниченко). Казан территориясендә бюджеттан финанслана торган 646 муниципаль учреждение эшли, шул исәптән 14 муниципаль унитар предприятие. Әмма федераль кануннар нигезендә, конкурентлы товар базарларында эшләүче предприятиеләр 2025 елның 1-нче гыйнварына кадәр юк ителергә яисә яңадан оештырылырга тиеш. Бүгенге көндә Казанда искәрмә астына «Водоканал» МУП кына эләгә. Ул су белән тәэмин итү һәм су бүлеп бирү буенча табигый монополия өлкәсендә эшчәнлек алып бара. Бу хакта бүген коронавирус инфекциясе таралуга каршы тору буенча штаб утырышында Җир һәм милек мөнәсәбәтләре комитеты рәисе Ренат Галәветдинов хәбәр итте.

Спикер ассызыклаганча, искәрмә астына «Метроэлектротранс» МУП та эләгергә тиеш. Казанда бердәнбер предприятие пассажирларны җир асты һәм җир өсте электр транспортында йөртә һәм, димәк, көндәшләре юк. Шулай ук Транспорт комитеты тәкъдиме буенча «ПАТП №2» һәм «ПАТП №4»не МУП формасында сакларга тәкъдим ителә. Алар сизелерлек социаль йөкләнеш алып баралар, пассажирларны, шул исәптән ташламалы категорияләрне ташуны тәэмин итәләр. «Әмма пассажир ташу тармагы предприятиеләре тиешле закон гамәле аркасында чыгарылмаган. ТР Җир һәм милек мөнәсәбәтләре министрлыгы Федераль монополиягә каршы хезмәт идарәсенә хат юллады. Уңай җавап биргән очракта, ТР Президенты Рөстәм Миңнеханов исеменнән РФ Хөкүмәте адресына шундый карар кабул итү өчен тәкъдимнәр әзерләү сорала», - дип аңлатты Р.Галәветдинов.

Башка МУПларга килгәндә, башта аларны акционерлык җәмгыятьләренә үзгәртергә тәкъдим ителә.

«Унитар предприятиеләр эшчәнлеге төрен булдыруга яки үзгәртүгә закон чыгару тыюы бизнесны алар белән конкуренциядән акрынлап азат итүгә юнәлдерелгән. Эшмәкәрлеккә ярдәм күрсәтү сәясәте эшендә бу билгеле бер плюс булып тора. Әмма һәр МУП буенча карар халык кызыксынулары һәм предприятиенең коммерцияле оешма буларак кызыксынулары арасында табыш алуга юнәлдерелгән баланс белән аңлатылырга тиеш», - дип ассызыклады спикер. Мисал итеп ул транспорт предприятиеләрен китерде. Әйтик, әгәр МУПлар үзләренә планлы-зыян китерә алса, хуҗалык җәмгыяте табышка ирешү өчен чыгымнарны минимальләштерергә мәҗбүр булачак, шул исәптән ташу куркынычсызлыгын тәэмин итүгә чыгымнарны кыскарту хисабына. «Моннан тыш, МУП хуҗалык җәмгыятенә муниципалитет ягыннан үзгәртелгәндә контроль һәм идарә итү функцияләре сизелерлек дәрәҗәдә юкка чыгачак. Бу минус булып тора», - дип билгеләп үтте Р.Галәветдинов.

«Без әлеге юнәлештә игътибар белән эшләячәкбез. Барлык МУПларны базар икътисады рельсларына үзгәртеп корырга ярамый, чөнки ул вакытта алар табыш турында гына уйлаячак. Шул ук вакытта алар социаль яктан җаваплы эш алып барырга тиеш. Шуңа күрә монда алтын урталык булырга тиеш», - дип ассызыклады Казан Мэры Илсур Метшин. Аның фикеренчә, «Азык-төлек һәм социаль туклану департаменты» акционерлык җәмгыяте иң яхшы мисал булып тора. Милекнең башка формасына күчкәндә, предприятие балалар бакчаларын, мәктәпләрне, хастаханәләрне, сәнәгать оешмаларын сыйфатлы тукландыруны дәвам итте. «Социаль әһәмиятле бурычларны үтәүче башка предприятиеләргә карата да шулай ук дөрес булачак», - дип йомгаклады шәһәр башлыгы.