Яңалыклар
16.07.2020, 11:06
И.Метшин «Яшь гвардия» лагере турында: «Быел балалар әти-әниләренең ничек ял иткәннәрен караячак, ә киләсе җәйдә биредә бөтенләй башка шартлар булачак»
Капиталь ремонттан соң лагерьда 16 яңа корпус, заманча спорт мәйданчыклары, мини-кинотеатр һәм клуб барлыкка киләчәк.
(Казан шәһәре KZN.RU, 16-нчы июль, Алена Мирошниченко). «Яшь гвардия» спорт-сәламәтләндерү лагерена капиталь ремонт проекты белән Казан Мэры Илсур Метшин танышты. Тиздән 90 ел элек төзелгән лагерь территориясендә яңа корпуслар, спорт мәйданчыклары һәм мини-кинотеатр барлыкка киләчәк, ә «Яшь гвардия»нең проект куәте ике тапкырга диярлек артачак. Моннан тыш, Илсур Метшин лагерьда Кулланучылар хокукларын яклау һәм кеше иминлеге өлкәсендә күзәтчелек федераль хезмәте тарафыннан билгеләнгән куркынычсызлык чараларын үтәү ничек оештырылуын тикшерде.
Исегезгә төшерәбез, быел катлаулы санитар-эпидемиологик вәзгыятькә карамастан, балалар һәм яшүсмерләр өчен җәйге ял оештырудан баш тартмаска дигән карар кабул ителде. Быел җәй муниципаль шәһәр яны лагерьларында 6 мең яшь казанлы ял итәчәк. Әмма лагерьларда беренче тапкыр махсус куркынычсызлык чаралары күрелде. Сменалар 1-нче июньнән түгел, ә 1-нче июльдән башланды. Килү алдыннан балалар белешмәләр, шул исәптән алар яшәгән территориядә коронавирус инфекциясе булмау турында белешмәләр бирделәр. Учреждениенең барлык хезмәткәрләре алдан коронавируска тест тапшырганнар. Билгеләп үтик, COVID-19-га күчмә киңәшмәдә катнашучылар да тест узды.
«Яшь гвардия» лагере башлыгы Алексей Кузин Казан Мэрына сөйләгәнчә, балалар куркынычсызлыгын тәэмин итү өчен, көненә ике тапкыр температураны үлчиләр, һәр корпуста һава рециркуляторлары эшли, барлык биналар бактерияләргә каршы чаралар белән эшкәртелә.
«Яшь гвардия» лагере 1932 елда төзелгән. Соңгы тапкыр реконструкция биредә 1961 елда үткәрелгән. 9,37 га мәйданлы лагерьның үткәрү сәләте сменага 242 кеше тәшкил итә. Ремонттан соң лагерьның проект куәте сменага 400 кешегә кадәр артачак. Быелгы җәйге сезонда спорт-сәламәтләндерү лагере 18-әр көнлек өч профильле смена оештыра, шул ук вакытта йөкләнеш 50%-ка кыскартылган. Хәзер лагерьда 121 спортчы ял итә һәм шөгыльләнә.
Бүгенге көндә лагерь территориясендә 7 торак корпус, хезмәт күрсәтүче персонал өчен 3 административ бина, авырулар өчен изоляторлар булган медпункт, ашханә һәм ябык бию мәйданчыгы урнашкан. Инженерлык коммуникацияләренә килгәндә, су белән тәэмин итү өчен артезиан скважинасы кулланыла, йортлар җылылык белән тәэмин ителми.
Хәзерге вакытта балалар алты спорт төре: футбол, баскетбол, волейбол, тимераякта шуу, ирекле көрәш һәм бокс буенча әзерләнәләр. Лагерьда тренировкалар өчен резина өслекле баскетбол мәйданчыгы, ясалма газонлы мини-футбол мәйданчыгы, резина өслекле ике баскетбол-волейбол мәйданчыгы, җир һәм ком өслекле стандарт булмаган ике футбол кыры җиһазландырылган.
Капиталь ремонт вакытында барлык торак корпусларны җимерәчәкләр. «Без республика программалары буенча күптән түгел төзелгән спорт мәйданчыкларын һәм 208 кеше сыйдырышлы ашханә бинасын гына саклап калачакбыз, соңгысы ремонтланачак, - дип сөйләде Физик культура һәм спорт комитеты рәисе Альберт Салихов. - Барлыгы балалар өчен 14 заманча торак корпус һәм хезмәт күрсәтүче персонал һәм хезмәткәрләр өчен ике корпус төзеләчәк. Балаларда шартлар уңайлырак булачак». Һәр корпуста 28 кеше яшәячәк - һәр бүлмәдә 4-әр кеше .
«Быел балалар әти-әниләренең ничек ял иткәнен караячак, ә киләсе җәйдә монда бөтенләй башка шартлар булачак», - дип билгеләде Казан Мэры Илсур Метшин. Ул шулай ук корпусларның берсен саклап калырга һәм анда лагерь музее оештырырга тәкъдим итте, анда казанлыларның берничә буыны ял иткән. «Музейда барысын да ничек булган, шулай калдырырга кирәк, бу бит безнең өчен дә тарих. Егетләр һәм аларның әти-әниләре лагерьның нинди булганын искә төшерә һәм аның ничек үзгәрүен күрә алачак», - диде шәһәр башлыгы. Сүз уңаеннан, лагерь тарихының якты сәхифәләренең берсе космонавт Юрий Гагаринның «Яшь гвардия»гә килүе булды.
«Яшь гвардия» лагеренда капиталь ремонт кысаларында яңа корпуслардан тыш, яңа футбол кырлары төзеләчәк, шуларның берсе - трибуналар белән булачак, йөгерү юллары, күнегүләр өчен ябык мәйданчык, воркаут өчен мәйданчык, пляж спорт төрләре өчен ике мәйданчык, икесе - бадминтон өчен, асфальт түшәлгән йөгерү юлы, җиңел атлетика сикерү зонасы барлыкка киләчәк. Лагерь территориясендә шулай ук мини-кинотеатр, мастер-класслар үткәрү өчен чатыр, клуб, тернәкләнү үзәге барлыкка киләчәк.
Яшь спортчылар белән аралашканда Казан Мэры балалар лагерьларына капиталь ремонт Татарстан Президенты Рөстәм Миңнеханов ярдәме белән башланды, дип сөйләде. «Быел без дүрт лагерьга капиталь ремонт ясыйбыз. «Яшь гвардия» безнең планнарга керде. Җәй көне без проект өстендә эшне тәмамлыйбыз, ә сентябрьдә, сез өйләрегезгә таралышкач, ремонт эшләрен башлыйбыз: эчке душ һәм бәдрәфле яңа корпуслар төзибез, ашханәне яңартабыз, актлар залы, зур футбол кыры төзибез. Шуңа күрә киләсе елда сез яңа шартларда ял итәчәксез», - диде шәһәр башлыгы.
Утырышта шулай ук Башкарма комитет җитәкчесенең беренче урынбасары Рөстәм Гафаров, Киров һәм Мәскәү районнары администрациясе башлыгы Сергей Миронов һәм башкалар катнашты.
Исегезгә төшерәбез, Казанда быел республика программасы буенча дүрт лагерьга капиталь ремонт төгәлләнеп килә: «Заречье», «Восток», «Юнитур» һәм «Яшьләр». Бу максатларга республика бюджетыннан 700 млн сум акча бүлеп бирелде. Бу елга тагын дүрт муниципаль лагерьны капиталь ремонтлау һәм реконструкцияләүне проектлауга акча бүлеп бирелде: «Яшь гвардия», «Огонек», «Татарстан пионериясе» һәм «Нармонка». Моннан тыш, юлларны төзекләндерү программасы ярдәмендә быел 44,8 млн сумга «Бригантина», «Юнитур», «Нармонка» лагерьларына керү юллары ремонтланачак. Узган ел сигез лагерьга керү юллары яңартылды.
Фоторепортаж
Казан Мэры «Яшь гвардия» лагерена капиталь ремонт ясау проекты белән танышты
Видеорепортаж
16.07.2020
11:06
Казан Мэры «Яшь гвардия» лагерена капиталь ремонт ясау проекты белән танышты
Шулай ук укыгыз
-
29.04.2025, 17:56 -
29.04.2025, 17:11 -
29.04.2025, 16:43 -
29.04.2025, 16:02
