И.Метшин: «Без акчаларны җәмәгать киңлекләренә тотарга гына түгел, ә алар ярдәмендә финанс якны яхшыртырга да өйрәнәбез»

Ел башыннан Казанның парклар һәм скверлар дирекциясе бюджеттан тыш фондка 80 миллион сумга якын акча җәлеп иткән.

Фото: Денис Гордийко

(Казан шәһәре KZN.RU 19 нчы сентябрь, Дмитрий Никитин). Ел башыннан Казанның парклар һәм скверлар дирекциясе бюджеттан тыш фондка 80 млн сумга якын акча җәлеп иткән. Бу хакта бүген эшлекле дүшәмбедә дирекция җитәкчесе Айгөл Латыйпова хәбәр итте.

«Без хәзер акчаларны җәмәгать киңлекләренә тотарга гына түгел, ә алар ярдәмендә финанс якны яхшыртырга да өйрәнәбез. Бу парк һәм скверларны киләчәктә карап тоту һәм ремонтлау өчен керем чыганакларына ия булырга мөмкинлек бирә», – дип билгеләде шәһәр башлыгы И.Метшин.

Гомуми керемнәрнең зур өлеше – 46,8 млн сум – никах теркәү залларын арендалаудан һәм Казан гаилә үзәгенең күзәтү мәйданчыгыннан кергән керемнәр. Моннан тыш, гаилә үзәгендә сувенир продукциясе белән кибет эшли башлады. Товар сатудан кергән табыш 4 млн сум тәшкил иткән.

Җәмәгать киңлекләрендә туклану һәм хезмәт күрсәтү объектларын урнаштыручы эшмәкәрләр дә уртак копилкага зур өлеш кертте. «Быел паркларда барлыгы 69 стационар булмаган сәүдә объекты урнаштырылды, шуларның 30 ы буенча урыннар агымдагы елның февралендә уйнатылды», – дип сөйләде А.Латыйпова. Паркларда стационар булмаган сәүдә объектлары урнаштырудан 19 млн сум акча җәлеп ителгән.

Дирекция үз сервисларын һәм хезмәтләр өлкәсен үстерүне дәвам итә. Әйтик, Кабан күле яр буенда шәһәрнең барбекю-зонасын 1000 нән артык тапкыр броньлаганнар, дирекция 800 мең сумга якын акча эшләгән.

«Урам» экстрим-паркы территориясендә түләүле парковка хезмәте күрсәтүдән 2 млн сум чамасы акча кергән. «Алынган табышны сервисны камилләштерүгә кертү планлаштырыла. Бүгенге көндә парковка өчен автомат түләү пунктларын сатып алу өчен документлар әзерләнә», - дип хәбәр итте А.Латыйпова.

«Шәһәрдә Казан паркларында һәм скверларында эшләргә теләүчеләр өчен барлык кирәкле мөмкинлекләр дә бар. Моның өчен бүгенге көндә таләпләр төгәл формалаштырылган, ә конкурс процедуралары бөтен кеше өчен бертөрле», – дип нәтиҗә ясады Мэр.