Казан дәүләт автоинспекциясе өч юл-транспорт һәлакәте шаһитларын эзли

Барлык очракларда машина йөртүчеләр юл-транспорт һәлакәте урыныннан качкан.

Фото: Денис Гордийко

(Казан шәһәре KZN.RU, 5-нче октябрь). Казан дәүләт автоинспекциясе берничә юл-транспорт һәлакәте шаһитларын эзли.

Юл-транспорт һәлакәтләренең берсе 2-нче октябрь 16.50 сәгатьтә Проточная урамындагы 6-нчы номерлы йорт янында була. Беренчел мәгълүматлар буенча, ачыкланмаган BMW автомобиле йөртүчесе, РФ Юл йөрү кагыйдәләренең п.8.3 бозып, йорт яны территориясеннән чыкканда, юл бирмәгән һәм автомобиль хәрәкәте уңаеннан уңнан сулга таба барган 22 яшьлек велосипед йөртүче кызны бәрдергән,шуннан соң РФ Юл йөрү кагыйдәләренең п. 2.5 бозып, һәлакәт урыныннан качкан. Велосипедчының уң тез буынының йомшак тукымалары имгәнгән, ул травматология пунктыннан җибәрелгән.

3-нче октябрь 15.00 сәгатьтә Ибраһимов проспекты буенча урнашкан 83-нче номерлы йорт ишегалдында, беренчел мәгълүматлар буенча, РФ Юл хәрәкәте кагыйдәләренең п. 8.12 бозып, билгесез машина йөртүче артка таба хәрәкәт иткәндә маневрның куркынычсызлыгын тикшермәгән һәм 84 яшьлек ханымны бәрдергән, шуннан соң вакыйга урыныннан качкан. Хатын умыртка баганасының бил бүлеге һәм уң балтырның имгәнүләрен алган, медицина ярдәме күрсәткәннән соң травматология пунктыннан җибәрелгән.

4-нче октябрь 16.09 сәгатьтә Достоевский урамындагы 53а номерлы йорт каршында билгесез машина йөртүче, беренчел мәгълүматлар буенча РФ Юл хәрәкәте кагыйдәләренең 8.12-нче пунктын бозып, янәшәдәге территориядән артка таба хәрәкәт итеп чыкканда, маневрның куркынычсызлыгын тикшермәгән һәм автомобиль хәрәкәте барган вакытта сулдан уңга таба хәрәкәт иткән 15 яшьлек велосипедчыны бәрдергән, шуннан соң вакыйга урыныннан качкан. Велосипедчының сул тез буыны имгәнгән, ул хастаханәдән җибәрелгән.

Казан дәүләт автоинспекциясе әлеге вакыйгаларның шаһитларыннан түбәндәге телефоннарга шалтыратуларын сорый: +7(843)533-38-19, 533-38-48.

Узган ялларда шәһәрдә барлыгы 264 юл-транспорт һәлакәте теркәлгән, шуларның 10-сы зыян күрүчеләр белән, дип хәбәр итә Россия Эчке эшләр министрлыгының Казан буенча ЮХИДИ идарәсе.

Шулай ук укыгыз

Барлык яңалыклар