Азык-төлек продуктларының сыйфаты һәм куркынычсызлыгы мәсьәләләре буенча кайнар линия 8 нче гыйнварга кадәр эшләячәк

Республика халкы сорауларына Россия кулланучылар күзәтчелеге белгечләре җавап бирәчәк.

Фото: Денис Гордийко

(Казан шәһәре KZN.RU, 29 нчы декабрь). 8 нче гыйнварга кадәр ТР буенча Россия кулланучылар күзәтчелеге идарәсендә азык-төлек продуктларының сыйфаты һәм куркынычсызлыгы, саклау шартлары һәм яраклылык мәсьәләләре буенча кайнар линия эшли.

Мөрәҗәгатьләр тәүлек буе бердәм консультация үзәгендә түбәндәге телефон аша кабул ителә: (800)555-49-43 (шалтырату бушлай). Шулай ук ТР буенча Россия кулланучылар күзәтчелеге идарәсенә түбәндәге телефоннар буенча шалтыратырга була: (843)273-34-85, 7(843)273-76-62. Кайнар линия көн саен 9:00 дән 16:00 гә кадәр эшли, тәнәфес – 12:00 дән 12:45 кә кадәр.

Татарстанлыларның сорауларына Идарәнең туклану гигиенасы күзәтчелеге бүлеге белгечләре җавап бирәчәк. Белгечләр азык-төлек продукциясен сатып алу һәм сату кагыйдәләре, саклау шартлары һәм яраклылык сроклары, товарларның сыйфатына һәм куркынычсызлыгына карата куела торган норматив таләпләр, кибеттә срогы чыккан продуктны алган очракта нишләргә кирәклеге турында җиткерәчәк.

Кибеттә сыйфатсыз продукт табылган очракта кулланучы, кулланучылар хокукларын яклау турындагы законнарда каралган таләпләр буенча, сатучыга карата дәгъва белән мөрәҗәгать итәргә хокуклы.

Таләпләр канәгатьләндерелмәгән очракта сатып алучы идарәгә 2006 елның 2 нче маеннан чыккан 52-ФЗ номерлы «Россия Федерациясе гражданнары мөрәҗәгатьләрен карау тәртибе турында»гы Федераль закон таләпләре нигезендә каралачак мөрәҗәгатьне җибәрергә хокуклы. Мөрәҗәгатьне «Гражданнар мөрәҗәгатьләрен кабул итү» электрон формасы аша идарә сайтында калдырырга яисә 420111, Казан, Большая Красная ур., 30 почта адресына җибәрергә була.

Шулай ук укыгыз

Барлык яңалыклар