Яңалыклар
26.01.2022, 16:14
РФ Цифрлаштыру министры: «Башка төбәкләр вәкилләре Татарстанга өйрәнергә һәм яхшы тәҗрибәне үзләштерергә килә»
ТР Министрлар Кабинеты һәм ТР Цирфлаштыру министрлыгының ТР Президенты катнашында узган утырышында Казанның цифрлаштыру өлкәсендәге эшләнмәләре турында фикер алыштылар.
Фото: ТР Президенты матбугат хезмәте
Моннан тыш, Татарстан социаль казначылык проектын гамәлгә ашыру һәм электрон паспортлар кертү өчен сынау төбәге булды. «Россия Президентының электрон паспортларын кертү турындагы Указы белән килешү нәтиҗәләре буенча Татарстан өч пилот төбәк арасында калды, бу ел ахырында яңа паспортлар бирә башларга планлаштырабыз», - дип хәбәр итте Максут Шадаев.
Казанда барлык мөрәҗәгатьләрнең 80%ы килә торган 65 хезмәт цифрлаштырылды
Казанда цифрлы проектларны гамәлгә ашыру турында шәһәр Башкарма комитеты җитәкчесе Рөстәм Гафаров сөйләде. «Цифрлы технологияләр теләсә кайсы территориянең социаль-икътисадый үсешенә яңа этәргеч бирергә сәләтле», – диде ул. ТР башкаласы илдә беренчеләрдән булып барлык муниципаль хезмәтләрне электрон форматка күчерә башлады. Барлык мөрәҗәгатьләрнең 80%ын тәшкил итүче 65 хезмәт цифрлаштырылган. «Ел саен муниципаль хезмәтләр артыннан гына да Башкарма комитетка 150 меңнән артык кеше мөрәҗәгать итә, һәм без әлеге процессны үтәкүренмәле, нәтиҗәле һәм уңайлы итеп эшләп, халыкның, хезмәткәрләрнең вакытын һәм кәгазьне экономиялибез», – дип ассызыклады Р.Гафаров.
Комплекслы муниципаль геомәгълүмат системасы соңгы ике елда Казанда тормышка ашырылган иң якты цифрлы проектларның берсе булды.
Хәзер 800 дән артык кеше, башка бүлекчәләрдән өстәмә мәгълүмат сорамыйча, көн саен системада эшли. Ул үзен практикада уңышлы күрсәтте – элек үзара язышу елына ун мең сорауны үз эченә алган, мәгълүмат көтүнең уртача вакыты 5 көн тәшкил иткән, хәзер аны бик тиз табарга мөмкин.
Узган ел система «Иң яхшы муниципаль тәҗрибә» бөтенроссия конкурсында икенче урынны алды. «2021 елда система ярдәмендә безнең хезмәткәрләр дистәләгән мең график хисап, киңлек объектлары һәм документлар төзеде», – дип хәбәр итте Рөстәм Гафаров. Системада шулай ук Төзелеш, архитектура һәм торак-коммуналь хуҗалык министрлыгы һәм Мәдәни мирас объектларын саклау комитеты белән документлар килештерелә. Система ярдәмендә, мәсәлән, элек реклама конструкцияләрен урнаштыру схемасын килештерү 30 көннән артык вакытны алып торган, хәзер – өч эш көне (документның берничә нөсхәсен бастыру соралмый).
Өстенлекле бурыч – муниципаль мөлкәтне исәпкә алу
Өстенлекле бурычлар арасында Рөстәм Гафаров муниципаль милекне исәпкә алуны атады – бу 350 мең объект, алар буенча меңләгән операция уздырыла, һәм елдан-ел күләмнәр арта гына бара. Узган ел әлеге мәгълүматлар 1С платформасында бердәм системага кертелгән иде, бу исәпкә алуның үтәкүренмәлелеген арттырырга мөмкинлек бирде. «Системада автомат рәвештә ачык кадастр картасыннан мәгълүмат күрсәтелә, контрагент тикшерелә, түләүләр җибәрелә, түләү өчен QR-код формалаша», – дип сөйләде ул.
Цифрлы инструментлар Казанда шәһәр хуҗалыгы өлкәсендә дә уңышлы кулланыла. Узган ел Татарстан Республикасы башкаласында махсус техника эшен мониторинглауның бердәм системасы эшли башлады. «Ул төп подрядчыларның 470 автомашинаның һәм көчле кар яву вакытында җәлеп ителгән 125 автомашинаның маршрут үтәлешен һәм чистарту эшләрен башкаруны контрольдә тота», – дип аңлатты Р.Гафаров.
Казанда шәһәрне төзекләндерү өлкәсен контрольдә тоту өчен CitySoft цифрлы сервисы сынала. «Киләчәктә аның ярдәмендә без автоматик режимда юлларны кардан, боздан һәм пычрактан чистартуга ихтыяҗны билгели һәм чистарту техникасы өчен бурычларны планлаштыра алачакбыз», – дип сөйләде Р.Гафаров. Шулай ук ясалма интеллект вандализм актларын, шәһәр хезмәтләре өчен проблемалы урыннарны – ачык люклар, аварияләр, кар җыюга комачаулый торган автомобильләр һәм башкаларны ачыкларга ярдәм итәчәк. Шул рәвшеле, мәгълүмат җыю өчен видеокамералар 17 юл чистарту машинасында һәм 29 автобуста урнаштырылган.
Шулай ук шәһәрдә искергән телефония системасын Татарстан җитештерүчеләренең «Эра» платформасына алыштыру башланды. Телефония контакт-үзәкне, мәгълүмат белән идарә итү системасын һәм «бер тәрәзә принцибы» буенча бурычларны үз эченә ала. Платформага бердәм дежур-диспетчерлык хезмәте һәм шәһәр районнары администрациясе күчерелгән инде. «Хәзер без операторларның йөкләнешен төгәл аңлыйбыз, шалтыратуларның иң күп чорларын һәм кабул ителмәгән һәр чакыруны теркәп барабыз. Быел әлеге эшләнмәне Башкарма комитетның барлык структураларында да кертергә уйлыйбыз», – дип хәбәр итте Рөстәм Гафаров.
«Цифрлы бухгалтерия»не гамәлгә ашыру тагын бер масштаблы проект булып тора, ул бухгалтерлык хезмәтләре эшен заманча хезмәт күрсәтү стандартларына күчерде. Бу системада Казанның 500 дән артык мәгариф учреждениесе электрон рәвештә эшли. 2021 елда электрон документлар әйләнеше системасы буенча 650 меңнән артык документ алынган һәм җибәрелгән.
Казан Мэриясендә виртуаль эш урыннары
Үзгәрешләр шулай ук шәһәр Мэриясенә дә кагылачак – Цифрлаштыру елында виртуаль эш урыннары булдыру планлаштырыла. VDI технологиясе (виртуаль эш өстәлләре инфраструктурасы) инде сынау уза. Ул хезмәткәрнең эш урынын серверда ышанычлы итеп сакларга мөмкинлек бирә, гадәти флеш-карта ярдәмендә аны теләсә кайсы компьютерда ачып булачак, шул ук вакытта мәгълүмат өченче затларга эләкмәве гарантияләнә.
Р.Гафаров ассызыклаганча, бу эшнең мөһим өлеше – цифрлы кадрлар платформасын булдыру. «Ул хезмәткәргә мәгълүматны реаль вакыт режимында җиңел алырга гына түгел, ә HR-циклга кергән бурычларның бөтен спектрын хәл итәргә дә мөмкинлек бирәчәк: максатлар куюдан һәм нәтиҗәләрне бәяләүдән алып персонал күнекмәләрен өзлексез үстерүгә кадәр», – дип билгеләде ул. Р.Гафаров электрон кадрлар документларын кәгазь чыганакта кабатламыйча куллану буенча эксперимент үткәрергә тәкъдим итте. Мондый тәҗрибә Россия Федерациясе Хөкүмәте структураларында бар икән инде.
ТР Президенты Рөстәм Миңнеханов Казанда гамәлгә ашырылган һәм эшләнә торган проектларны югары бәяләде. Республика башлыгы фикеренчә, халыкның мәгариф, мәдәният, сәламәтлек саклау, торак-коммуналь хуҗалык өлкәләренә тиз чыга алуы әлеге үзгәрешләрнең нәтиҗәсе булырга тиеш.
Максут Шадаев ассызыклаганча, республика һәрвакыт заманча цифрлы технологияләр кертү буенча лидерлар рәтендә булды һәм Татарстан эшләнмәләре илнең башка төбәкләрендә дә кулланылды (электрон документлар әйләнеше, электрон сәүдә, республика дәүләт хезмәтләре). «Инде күп еллар республикага башка төбәкләр вәкилләре өйрәнергә һәм яхшы тәҗрибәне үзләштерергә килә. Әмма лидерлыкка чыгу бер эш, ә елдан-ел иң яхшы булу хокукын исбатлау – икенче, бу бюджет, оештыру, техник яктан зур ресурслар таләп итә», – дип ассызыклады министр.
Шулай ук укыгыз
-
29.04.2025, 17:56 -
29.04.2025, 17:11 -
29.04.2025, 16:43 -
29.04.2025, 16:02
