ТР Гидрометеорология үзәге киләсе атна башында кыска вакытлы бураннар һәм бозлавык турында кисәтә

12-15 нче ноябрьдә республикада явым-төшем күләме айлык нормага җитәргә мөмкин.

Фото: Денис Гордийко

(Казан шәһәре KZN.RU, 11 нче ноябрь). 12 нче ноябрьдән 15 нче ноябрьгә кадәр һава шартлары сизелерлек начарланачак. Бу актив төньяк атлантик циклонның Россиянең Европа территориясенә керүе белән бәйле.

Ял көннәрендә синоптиклар көчле яңгыр вәгъдә итә. Иртәгә, 12 нче ноябрьдә, секундына 15-18 метрга кадәр көчле җил фаразлана, ә 13 нче ноябрьдә ул секундына 15-20 метрга кадәр көчәячәк, урыны белән секундына 24 метрга кадәр җитәчәк. Һава температурасы +3-8 градус тәшкил итәчәк.

Татарстан Гидрометеорология үзәге кисәткәнчә, киләсе атна башында республика аша салкын атмосфера фронты узачак. Көнбатыш җил юнәлеше төньякка күчәчәк, ул исә арктика һава массаларын китерәчәк һәм татарстанлыларны һава торышындагы кискен үзгәрешләр көтә.

14 нче ноябрь, дүшәмбе көнне, синоптиклар яңгыр һәм кар фаразлыйлар, шул исәптән юеш кар явачак. Көндез кыска вакытлы бураннар көтелә, юлларда бозлавык һәм кар боткасы хасил булырга мөмкин. Һава температурасы -2 дән +3 градуска кадәр булачак.

15 нче ноябрь, сишәмбе көнне, азрак кар явачак һәм -7 дән -2 градуска кадәр суытачак. Юлларда бозлавык барлыкка килергә мөмкин.

Синоптиклар шулай ук атмосфера басымының кискен үзгәрүе турында кисәтә. Ял көннәрендә ТР халкы аның сизелерлек кимүен сизә ала, ә киләсе атна башында – сизелерлек үсеш фаразлана. Моннан тыш, 12 нче ноябрьдән 15 нче ноябрьгә кадәр явым-төшем айлык нормага җитәргә мөмкин.

Шулай ук укыгыз

Барлык яңалыклар