«Созвездие-Йолдызлык» республика фестиваленең Гала-концерты Казанда 29 апрельдә узачак

Быел фестивальдә 20 меңгә якын бала катнашты, алар жюри хөкеменә 3 меңгә якын иҗади номер тәкъдим итте.

(Казан шәһәре KZN.RU, 5-нче апрель, Алена Мирошниченко). 29-нчы апрельдә Казанда, «Пирамида» мәдәни-күңел ачу комплексында «Созвездие-Йолдызлык» эстрада сәнгате ачык республика телевизион яшьләр фестиваленең зур гала-концерты узачак, анда җиңүчеләр исемнәре игълан ителәчәк. Быел фестивальдә 20 меңгә якын бала катнашты, алар жюри хөкеменә 3 меңгә якын иҗади номер тәкъдим итте. Бу хакта бүген «Татар-информ» мәгълүмат агентлыгында узган матбугат конференциясендә хәбәр иттеләр.

Быел фестиваль республикада 17-нче тапкыр уза, ел саен аның сәхнәсендә яңа йолдызлар барлыкка килә. Татарстан Республикасы Яшьләр эшләре һәм спорт министрының беренче урынбасары Тимур Сөләйманов билгеләп үткәнчә, бүген «Созвездие-Йолдызлык» - мәгариф һәм мәдәният проекты, ул республикада гамәлгә ашырыла торган яшьләр сәясәтен чагылдыра. «Фестиваль матурлыкка омтылучы, ә сәхнәгә чыккач, белгечләрдән яхшы бәя ала торган яшь буынны тәрбияли. Моннан тыш, бу социаль лифт, балалар өчен үзләрен күрсәтү һәм танылу мөмкинлеге», - дип ассызыклады министр урынбасары.

«Татарстан һәм аның күпмилләтле халкы мәдәни кодны сакларга омтыла. «Йолдызлык» - мәдәниятебеә сагында тора торган чара», - дип билгеләп үтте фестивальнең генераль продюсеры Дмитрий Туманов. Аның мәгълүматлары буенча, Татарстан халкының дүрттән бере республика фестивале тормышына җәлеп ителгән. Онлайн-трансляцияләрне 278 мең кеше тамаша кылуы билгеле.

РФ һәм ТР халык артисты, Н.Җиһанов исемендәге Казан дәүләт консерваториясе профессоры, фестивальнең жюри рәисе Зилә Сөнгатуллина, конкурсантлар арасында конкуренция югары булуга карамастан, «Созвездие-Йолдызлык» балаларны бер-берсенә ярдәм итәргә өйрәтә, дип өстәде. «Сәхнә артында дуслык һәм мәхәббәт хөкем сөрә, балалар һәрвакыт бер-берсенә ярдәм итә. Гомумән, республикабызның үз балаларын чын-чынлап яратуы һәм аларның киләчәге турында кайгыртуы сөендерә», - диде ул.

Исегезгә төшерәбез, Казанның «Йолдызлык-2019» яшьләр эстрада сәнгате фестиваленә 28-нче мартта нәтиҗә ясалды. Егерме беренче зур гала-концерт Идел буе спорт һәм туризм академиясенең концертлар залында узды.

Шулай ук укыгыз

Барлык яңалыклар