Казан – Санкт-Петербург маршруты буенча йөрүче фирма поездларын яңа вагоннар белән комплектлаганнар

Алар климат-контроль, душ һәм экологик санитар бүлмәләр белән җиһазландырылган

133/134 номерлы «Идел буе» һәм 59/60 номерлы «Идел» фирма поездлары составлары 38 яңа пассажир вагоны белән комплектланган. Поездлар Горький тимер юлында Казан – Санкт-Петербург һәм Түбән Новгород – Санкт-Петербург маршрутлары буенча йөри, дип хәбәр иттеләр Горький тимер юлының («РТЮ» ААҖ филиалы) матбугат хезмәтендә.

Узган ел магистральгә 18 плацкарт һәм 14 купе вагоны, шулай ук аз хәрәкәтләнүче пассажирлар өчен җайлаштырылган алты штаб вагоны китерелгән. Аларда климат-контроль системасы, душ һәм экологик чиста санитария бүлмәләре бар.

Вагоннардагы һәр урын розеткалар, мобиль җайланмаларга зарядка җыйдыру өчен USB-тоташтыргычлар, яктырткычлар һәм Брайль шрифтлы табличкалар белән җиһазландырылган. Чүп-чарны аерым җыю өчен контейнерлар һәм пурифаерлар (суны чистарту, кайнату һәм суыту өчен приборлар) бар.

Заманча вагоннарда мөһим техник характеристика – һаваны чистарту һәм зарарсызландыру системасы бар. Тышкы яктан кергән һава тузанны һәм начар исләрне тотып торучы ике баскычлы фильтрация системасы буенча чистартыла. Пассажирлар өчен зыянсыз зарарсызландыру ультрафиолет лампалар хисабына башкарыла.

Горький тимер юлы – «РТЮ» ААҖ филиалы Россия Федерациясенең 15 субъекты территориясе аша уза, алар арасында сигез өлкә (Мәскәү, Владимир, Түбән Новгород, Киров, Свердловск, Вологда, Рязань, Ульяновск), алты Республика (Мордовия, Чувашия, Удмуртия, Татарстан, Марий Эл, Башкортстан) һәм Пермь крае бар.

Шулай ук укыгыз

Барлык яңалыклар