Камал исемендәге театрның яңа бинасы архитектура концепциясен эшләү буенча конкурс финалистлары Казанга киләчәк

Семинар вакытында алар булачак бинаның территориясен карап чыгачак һәм экспертлар белән очрашачак.

Фото: Денис Гордийко

(Казан шәһәре KZN.RU, 23-нче ноябрь). 27-28-нче ноябрь көннәрендә Казанда Галиәсгар Камал исемендәге Татар дәүләт академия театрының архитектура концепциясен эшләүгә ачык халыкара конкурс финалистлары өчен юнәлеш бирә торган семинар узачак. Конкурсантлар мәдәният учреждениесе бинасын төзү планлаштырыла торган территорияне карап чыгачак һәм экспертлар белән очрашачак. Татарстан башкаласына Австрия, Бөек Британия, Испания, Россия һәм Япониядән барлыгы 23 финалист киләчәк.

Семинар программасы шартлы рәвештә 3 тематик блокка бүленә: «Проектлау», «Театр+Шәһәр» һәм «Театр». Аларның беренчесе кысаларында катнашучылар Г.Камал исемендәге театрның яңа бинасы урнашкан территориядә йөриячәк һәм киләчәктә проектны гамәлгә ашыру өчен җаваплы жюри әгъзалары һәм ведомство вәкилләре белән аралашачак.

«Театр+шәһәр» блогына финалистларны Татарстан башкаласының архитектура, шәһәр төзелеше һәм мәдәни контекстларына чумдыруга юнәлдерелгән экскурсияләр керәчәк. Казан төбәге белгечләре, тарихчылар һәм сәнгать белгечләре шәһәрнең тарихи бистәләрен, Казан Кремлен һәм шәһәр үзәгендә урнашкан заманча корылмаларны күрсәтәчәк. Катнашучылар шулай ук Татарстан Милли музеенда да булачак.

Соңгы блок – Г.Камал исемендәге театрда махсус программа. Башта конкурста катнашучыларны экскурсия көтә: аларга театр цехларының эшен күрсәтәчәкләр һәм хәтта артистлар эшендә катнашып карарга тәкъдим итәчәкләр. Сессиядә «Әлү, мин театрда!» («Але, я в театре!») спектаклен лаборатор күрсәтү булачак – бу Ксения Шачнева һәм Гөлнара Фазлыйәхмәтованың «шәһәрлеләр театры» форматындагы спектакль. Спектакль мондый форматта театрның күченүе темасына уйлану өчен махсус булдырылган.

Искәртеп узабыз, архитектура конкурсына 23-нче июль көнне старт бирелде. Аның инициаторлары – республика Президенты Рөстәм Миңнеханов һәм Г.Камал исемендәге Татар дәүләт академия театры. Конкурс Татарстан Хөкүмәте, ТР Мәдәният министрлыгы, Казан Башкарма комитеты һәм «Татарстан Республикасы шәһәрләре үсеше институты» Фонды ярдәмендә уза. 12-нче октябрьдә жюри утырышы нәтиҗәләре буенча финалга 8 консорциум чыкты.

Шулай ук укыгыз

Барлык яңалыклар