Казанда 1-4 ноябрьдә «Зиланткон» фестивале узачак

Фестивальдә катнашучыларны 250-дән артык чара көтә.

(Казан шәһәре KZN.RU, 7-нче октябрь). 1-нче ноябрьдән 4-нче ноябрьгә кадәр Казанда В.И.Ленин исемендәге мәдәният йортында фантастика, толкиенистика һәм рольле уеннарның 29-нчы халыкара «Зиланткон» конвенты узачак. Ул бөтен Россиядән һәм башка илләрдән катнашучыларны җыячак.

Фестивальдә катнашучыларны 250-дән артык чара көтә: мастер-класслар, лекцияләр, концертлар, костюмнар булдыру буенча семинарлар, турнирлар, ярминкәләр һәм костюмлы баллар.

Фестиваль традицион рәвештә берничә тематик мәйданчыкка бүленәчәк. Шулай итеп, өстәл уеннары мәйданчыгында барлык теләүчеләр күптән билгеле һәм өр-яңа уеннар уйный, шулай ук борынгы дөньяның өстәл уеннары белән таныша алачак.

«Менестрельник» музыкаль мәйданчыгында яшь җыр авторлары һәм башкаручылары конкурсы узачак. Ә спорт мәйданчыгында артистик фехтование буенча турнир узачак, ул быел Татарстан Республикасының Ачык кубогы статусын алды һәм Россия Артистик фехтование федерациясенең рәсми квалификация турниры булды. Бу мәйданчыкта шулай ук рестлинг буенча ярышлар, киокушинкай буенча мастер-класс һәм башка чаралар узачак.

«Зилант»та катнашучыларны һәм кунакларны нон-стоп режимында эшләүче мастер-класслы ачык зоналар да сөендерәчәк. Әлеге мәйданчыкларда теләгән һәр кеше конвент турындагы истәлеккә үз куллары белән эшләнмә ясый алачак. Традицион юнәлешләрдән тыш, быел беренче тапкыр прическалар буенча мастер-класс булачак.

Конвентта Палестинадан килгән рольле уеннар остасы Валид Мостафа булачак, ул гарәп дөньясында рольле уеннарның барлыкка килү тарихы һәм стиле турында сөйләячәк.

Фестивальнең барлык мәйданчыклары 10.00 сәгатьтән 22.00 сәгатькә кадәр эшләячәк, теләгән һәркем аларга керә алачак. Ә «Зилант»ның төнге программасын конвентта катнашучылар гына күрә алачак, ул 22.00 сәгатьтән соң Горбунов исемендәге Казан авиация җитештерү берләшмәсе территориясендә узачак, дип хәбәр итә оештыручылар.

Шулай ук укыгыз

Барлык яңалыклар