Казанда «Кырым язы» фестивале узды

Кырымның Россия белән кушылуына бер ел тулу уңаеннан шәһәр халкын Башкарма комитет җитәкчесе Рөстәм Гафаров котлады.

Фото: Денис Гордийко

(Казан шәһәре KZN.RU, 20-нче март, Ксения Швецова). Бүген Казанда Бауман урамында «Кырым язы» фестиваленең бәйрәм концерты узды. Сәгать янында урнаштырылган сәхнәдә Казан шәһәр филармониясе солистлары һәм шәһәрнең иҗат коллективлары чыгыш ясады. Кырымның Россия белән яңадан берләшүенең җиденче еллыгы белән казанлыларны Башкарма комитет җитәкчесе Рөстәм Гафаров котлады.

«Бүген биредә шәһәр халкын сөендерү, бәйрәм турында искәр төшерү өчен иң яхшы иҗат коллективлары җыелды, – диде Р.Гафаров. – Безнең Кырым һәм Севастополь белән тарихыбыз, уңышларыбыз уртак. Безнең балалар Кара диңгез ярларына ял итәргә һәм сәламәтлекләрен ныгытырга йөри, яшьләр берләшмәләре һәм иҗади төркемнәр даими тәҗрибә алмаша. Моннан тыш, 2019 елда без килешү төзедек, аның ярдәмендә безнең хәрби хезмәткә алынучылар Кырым ярымутравында хезмәт итәргә бара. Ышанам ки, безнең дустанә мөнәсәбәтләребез вакытлар үтү белән ныгыр гына».

Концерт Гөлшат Имамиева башкаруында «Чәчәк ат, җирем минем» композициясе белән башланып китте. Шулай ук җыелган халык өчен Айдар Габдинов, Николай Коновалов, Ләйсән Закирова, Алсу Вәлиуллина, Гөлназ Гафурова, балалар һәм яшьләр ансамбльләре һәм башкалар чыгыш ясады. Концерт «Күңелле Волгари» эстрада-фольклор ансамбле чыгышы белән тәмамланды.

Казанның популяр артистларының чыгышларын тыңларга һәм бәйрәмдә катнашырга шәһәр халкы килгән иде, алар яхшы таныш җырлар җырладылар. Алар арасында – Аида Галимҗанова да бар иде. «Мин концертка барырга планлаштырмадым, музыка ишеткәч, кем чыгыш ясавын карарга теләдем. Яхшы әле, концерт урамда үткәрелә, чөнки биналарда уза торган чараларга коронавирус аркасында без әлегә йөрмәскә тырышабыз», – дип сөйләде Казанда яшәүче.

Исегезгә төшерәбез, Татарстан башкаласында Кырымның Россия белән яңадан берләшүенең җиденче еллыгына багышланган чаралар 18-нче мартта башланып китте. Бауман урамындагы концерттан тыш, «Кырым язы» фестивале программасында викториналар, әдәби марафон, кино күрсәтүләр һәм башкалар булды. Мәсәлән, бүген кич белән казанлылар «Северный» мәдәният йортында концерт программасын ишетә алачак.

Моннан тыш, шәһәрнең мәдәният һәм яшьләр сәясәте учреждениеләре социаль челтәрләрдә онлайн-чаралар оештырды, аларны #КрымскаяВесна һәм #РоссияСевастопольКрым хештеглары буенча табарга мөмкин. Чараларның тулырак программасы белән kzn.ru порталында «Кырым язы» бүлегендә танышырга мөмкин.