“Игелекле дулкын” фестивале балаларның хыялларын тормышка ашыра

“Игелекле дулкын” фестивале балаларның хыялларын тормышка ашыра

<p> (Казан шәһәре KZN.RU, 16-нчы ноябрь, Алина Бережная). “Игелекле дулкын” Бөтенроссия фестивалендә балаларның хыяллары тормышка ашуын бүген Мәскәүдә балалар иҗат хәрәкәтенең сайлау турлары тәмамлануга багышланган матбугат конференциясендә күрделәр.<br> </p> <p> Композитор, “Игелекле дулкын” фестиваленең генераль продюсеры Игорь Крутой Мәскәүнең Часцовский җирлегеннән 11 яшьлек Валерия Сайкованың теләген тормышка ашырды. Матбугат конференциясендә композитор аккомпанементы астында кечкенә кыз “Нарисуй” җырын башкарды. Әлеге композиция белән Валерия Мәскәүдә үткән төбәк турында гран-при отты. </p> <p> Журналистлар белән очрашуда Казан Мэры Илсур Метшин, “Игелекле дулкын” фестиваленең генераль продюсеры Игорь Крутой, “Линия жизни” хәйрия фонды президенты Фаина Захарова, Игорь Крутой академиясенең генераль директоры Стелла Хачанянц һәм “Игелекле дулкынның” матбугат секретаре Людмила Ермолаева катнаштылар. </p> <p> Күп кенә катнашучылар танылган артистлар белән бергә чыгыш ясарга хыяллана. Төбәк турларында катнашучыларның да хыяллары тормышка ашачак. “Игелекле дулкынның” матбугат секретаре Людмила Ермолаева сөйләгәнчә, гран-прига ия булучыларның берсе 14 яшьлек начар күрүче малай орган музыкасы концертында булырга хыялланган. Илсур Метшин һәм Игорь Крутой ярдәмендә аның теләге тормышка аша. </p> <p> “Фестивальгә ярдәм итүчеләрнең барысына да рәхмәтемне белдерәм. Тагын бер тапкыр Игорь Крутой һәм аның командасына, сайлап алу этаплары узган шәһәрләргә һәм битараф булмаган кешеләргә рәхмәт”, - диде Илсур Метшин. </p> <p> Зональ турлар Казанда 6 июньдә башланды. Аларның нәтиҗәләре буенча музыка, хореография, сәхнә сәнгате номинацияләрендә 130 җиңүче билгеләнгән. </p> <p> Фестивальнең финал аккорды Казанда 30 ноябрьдә яңгыраячак. “Пирамида” концерт-күңел ачу комплексында “Игелекле дулкын” төбәк этаплары җиңүчеләре Филипп Киркоров, Сергей Лазарев, Динә Гарипова кебек Россия эстрадасы йолдызлары белән чыгыш ясаячаклар. Күп кенә бала өчен фестиваль иҗади мөмкинлекләрен күрсәтү мәйдәнчыгы гына түгел, ә хыялларын тормышка ашыру мөмкинлеге дә. </p> <p> “30 ноябрьдә Казанга килегез. Без сезгә барысын да күрсәтербез һәм сөйләрбез. “Игелекле дулкын” “Игелекле Казан” проектының бер өлеше генә. Йөз тапкыр ишеткәнче, бер тапкыр күрү яхшырак. Залда булганда, әлеге кешеләрне күреп, аларның энергетикаларын тоячаксыз. Бу искиткеч хис”, - дип тәмамлады И.Метшин. </p>

2018-11-16T17:50:24+0300