Евгений Богачев «Казанның Мактаулы гражданины» исеменә лаек булды

Мондый карарны бүген XXIV сессиядә Казан шәһәр Думасы депутатлары кабул итте

Фото: Денис Гордийко

(Казан шәһәре KZN.RU, 24 нче август, Татьяна Марюхова). «УНИКС» баскетбол клубы президенты – генераль директоры Евгений Богачев «Казанның Мактаулы гражданины» исеменә лаек булды. Бүген Казан шәһәр Думасы депутатлары Татарстан башкаласы Мэры Илсур Метшин рәислегендә шәһәр Ратушасында уза торган XXIV сессиядә шундый карар кабул итте.

Мактаулы гражданин кандидатурасын карауга шәһәр башлыгы чыгарды. Ул Евгений Богачевның зур хезмәт биографиясе булуын билгеләп үтте.

Евгений Богачев Казанның «Экран» җитештерү берләшмәсендә баш инженер булып эшли, ә бер елдан соң әлеге берләшмәне җитәкли. Моннан тыш, ул 29 яшендә әлеге вазифаны биләп, Татар АССРның көнкүреш хезмәт күрсәтү министрының иң яшь урынбасары була. «Бу өлкәдә эшләгәндә ул корпоратив фикерләүгә нигез салды, тармакның рентабельле предприятиеләре челтәрен булдырды һәм елына күләмнәрнең 30% ка кадәр үсүенә иреште», – дип ассызыклады Илсур Метшин.

«1998 елның көзендә республиканың беренче Президенты Минтимер Шәрип улы Шәймиев үтенече буенча «УНИКС» баскетбол клубы җитәкчелеген кабул итә. Богачев килгәч, баскетбол иң популяр спорт төрләренең берсенә әверелә. Өстәвенә шулкадәр популяр була ки, клуб җанатарларын шәһәрнең спорт сараендагы иң зур залы сыйдыра алмый башлый», – дип хәбәр итте Мэр.

Евгений Богачев инициативасы белән Россиядә иң зур махсуслаштырылган спорт комплексы «Баскет-холл», ә соңрак шәһәр читендәге спорт базасы төзелә. Клуб үз чыгышларының тотрыклылыгын саклый, Казанны һәм Татарстанны данлап, эчке һәм халыкара аренада җиңәргә омтыла. 25 ел эчендә команда Евролигада чыгыш нәтиҗәләре буенча континентның иң яхшы сигез клуб командасы арасына керә, Россия Европа Кубогында җиңү яулый (2009 һәм 2011 еллар). Ләкин клуб коллекциясенә бер иң кирәкле трофей – Россия чемпионы титулы җитми.

Быел Евгений Богачев һәм баш тренер Велимир Перасович җитәкчелегендәге команда үзе өчен тарихи казанышларга ирешә: «УНИКС» Россия һәм ВТБ Бердәм Лигасы чемпионы була.

Нәтиҗәле хезмәт эшчәнлеге белән беррәттән, ул Татарстан һәм Казанның иҗтимагый тормышында да катнаша. Евгений Богачев ярдәме белән Раифа ирләр Богородица монастыре торгызылган, берничә гыйбадәтханә реставрацияләнгән, Свияжскида чиркәүләр һәм монастырьлар торгызылган.

Казан шәһәр Думасы депутатлары тәкъдим ителгән кандидатураны хупладылар һәм Евгений Богачевка «Казанның Мактаулы гражданины» исемен бирү турында карар кабул иттеләр. Шәһәрнең югары бүләге 30 нчы августта тапшырылачак.