Иртәгә Иске Татар бистәсендә «Мәдәниятләр мозаикасы» этно-конфессиональ фестивале узачак

Программада: концерт, мастер-класслар һәм халык уеннары

Иске Татар бистәсендә иртәгә, 14 сентябрьдә, «Мәдәниятләр мозаикасы» Республика этно-конфессиональ фестивале узачак. Чара кунакларын «Халыклар дус гаилә» күпмилләтле концерт һәм җыр-бию тамашасы көтә.

Мәдәният идарәсеннән хәбәр итүләренчә, бәйрәмнең махсус кунаклары Татарстанның атказанган артистлары Марина Карпова, Марсель Вәгыйзов һәм Марат Галимов, шулай ук Shoner Paul һәм Илгиз Шәйхразиев, ZAKARIA фолк-төркеме һәм «ЖИВaGO» фолк-проекты булачак.

Мәйданчыкта каллиграфия, уенчыклар һәм бизәнү әйберләре ясау буенча мастер-класслар узачак. Кунаклар халык уеннарында һәм күңел ачуларында катнаша, милли ашлардан авыз итә алачак.

Бәйрәм программасы 12:00 сәгатьтә башлана һәм 18:00 сәгатькә кадәр дәвам итәчәк. Чарага керү ирекле.

Шулай ук укыгыз

Барлык яңалыклар