«Духов день в Суконной слободе»: һөнәрчелек мастер-класслары, мотошоу һәм Сергей Трофимов концерты

Традицион православие фестивале Казанның берничә мәйданчыгында узачак.

Фото: Марат Мугинов

(Казан шәһәре KZN.RU, 10-нчы июнь). 20-21-нче июнь көннәрендә Казанда V «Духов день в Суконной слободе» православие шәһәр фестивале узачак.

Бәйрәм берничә мәйданчыкта оештырыла: Изге Рух иңү чиркәве территориясендә, «Әкият» курчак театры каршындагы «Чәчәкләр фестивале» мәйданында, Изге Иоасаф (Удалов) йортында, Татар дәүләт филармониясендә.

Фестиваль программасына күпсанлы чаралар кертелгән – гыйбадәт кылу, шәһәр халык һәм мәхәллә коллективлары концерты, чиркәү классик гыйбадәт музыкасы концерты, ярминкәләр, һөнәрчелек мастер-класслары, экология буенча лекцияләр, хәйриячелек, ташландык храмнарны торгызу турында дискуссия клублары.

Шулай ук Сукно бистәсе территориясе буенча экскурсияләр, мотошоу һәм «Духов день» ансамбле, Казанның «Медвежий угол» төркеме, Павел Фәхртдинов һәм Алексей Вдовинның «ХБ проекты», LARGO арт-төркеме катнашында гала-концерт булачак. Фестивальнең хедлайнеры – автор-башкаручы Сергей Трофимов. «Духов день в Суконной слободе» бәйрәменең тулы мәдәни һәм музыкаль программасы фестивальнең сайтында тәкъдим ителде.

Фестивальнең барлык төп чараларында катнашу – бушлай. Экскурсияләрдә һәм дискуссия клубларында урыннар чикләнгән булуга бәйле рәвештә алдан теркәлү ачылачак, дип хәбәр итә оештыручылар.

Шулай ук укыгыз

Барлык яңалыклар