Өстәмә поездлар Казан белән Адлерны тоташтырачак

Рейслар октябрь, ноябрь һәм декабрьгә планлаштырылган.

Фото: Марат Мөгыйнов

(Казан шәһәре KZN.RU, 22 нче сентябрь). Өстәмә поездлар Казан – Адлер маршруты буенча билгеләнде, бу Россиянең Кара диңгез ярлары курортлары юнәлешендә пассажирлар йөртүгә ихтыяҗ арту белән бәйле.

Казаннан өстәмә поездлар 3 нче, 15 нче, 21 нче һәм 27 нче октябрь, 2 нче, 8 нче, 14 нче, 20 нче һәм 26 нчы ноябрь, 2 нче һәм 8 нче декабрь көннәрендә 12:07 сәгатьтә кузгалачак. Алар киләсе тәүлекнең 12:32 сәгатендә Адлерга килеп җитә. Адлердан поездлар 22:43 сәгатьтә китәчәк, Татарстан башкаласына икенче көнгә 23:10 сәгатьтә килеп җитәчәкләр, дип хәбәр итә Горький тимер юлының Казан төбәге матбугат хезмәте.

Поездлар составында заманча купе, плацкарт, югары уңайлыклар белән, махсус купе белән аз хәрәкәтле пассажирлар өчен җайлаштырылган вагоннвр бар. Алар уңайлы сәяхәт өчен кирәк булган барлык әйберләр белән җиһазландырылган, шул исәптән кондиционер, санитар бүлмәләр, гаджетлар өчен зарядка розеткалары белән.

Йөрү документларын «Россия тимер юллары» ААҖ рәсми сайтында, «Россия тимер юллары пассажирларга» мобиль кушымтасы яки тимер юл кассаларында рәсмиләштерергә мөмкин. Ерак араларга йөрүче поездлар җәдвәле турында өстәмә мәгълүматны «Россия тимер юллары» ачык акционерлык җәмгыятенең клиентларга ярдәм итү үзәгендә +7(800)775-00-00 телефоны аша белергә була (шалтырату Россиянең барлык төбәкләреннән бушлай).

Шулай ук укыгыз

Барлык яңалыклар