«Царицынский бугор» торак комплексы һәм Чистай урамы буенча урнашкан 68-нче квартал йортлары файдалануга тапшыру өчен рөхсәт алды

Өлешчеләр озак көтелгән фатирлардан ачкычларны киләсе ел башында алачак.

(Казан шәһәре KZN.RU, 30-нчы декабрь). Казанда алданган өлешчеләрнең проблемалы ике объекты - «фон»ның «Царицынский богор» торак комплексы һәм Чистай урамындагы 68-нче квартал торак йортларын файдалануга тапшыру өчен рөхсәт алды. Өлешчеләр үз фатирларыннан ачкычларны киләсе ел башында алачак, дип хәбәр иттеләр Торак сәясәте идарәсендә.

Казанның Башкарма комитеты тарафыннан төзүчегә - «Фучика» торак-төзелеш кооперативына – 12,14 катлы торак йортны файдалануга тапшыру өчен рөхсәт бирелде. «Царицынский бугор» торак комплексы йортында (Нокса авышлыгы ур., 4) 241 фатир, шулай ук 195 машина урынына исәпләнгән җир асты автостоянкасы бар. Башта «фон» йортын 2014 елда тапшырырга ниятләгәннәр. Йортның гомуми мәйданы 13419 кв.м тәшкил иткән.

Моннан тыш, Казан Башкарма комитеты төзүчегә – «68 квартал» торак-төзелеш кооперативына –Чистай ур., 61д адресы буенча урнашкан ике блоклы торак йортны файдалануга тапшыруга рөхсәт бирде, объектның гомуми мәйданы - 28524 кв.м. Йортта 311 фатир бар.

Чистай урамы һәм Әмирхан проспекты киселешендәге әлеге йортны төзү 2005 елда башланган иде, аны 2012 елда файдалануга тапшырырга тиешләр иде, әмма төзүченең, «Маг-Строй» җаваплылыгы чикләнгән җәмгыятенең, банкротлыгы аркасында, төзелеш эшләре туктатылды. 2018 елның көзеннән башлап, ике елга якын эшләр алып барылмаган проблемалы объектны төзеп бетерергә «Бриз» компаниясе алынды.

Исегезгә төшерәбез, быел Казанда өч проблемалы объект – «Свей»ның Четаев урамындагы 136 фатирлы дүртенче йорты, Роторная урамындагы 180 фатирлы 4-нче номерлы йорт һәм «Фон»ның «Молодежный» торак комплексындагы беренче йорт файдалануга тапшырылды.

Шулай ук укыгыз

Барлык яңалыклар