«Шәфкатьлелек – Казан» хезмәте волонтерлары хоспис пациентларына кулдан эшләнгән бүләкләр тапшырды

Хәйрия акциясендә Казанда яшәүче 20 хатын-кыз катнашты

Фото: vk.com/miloserdie.kazan

(Казан шәһәре KZN.RU, 23 нче май). Казанның «Шәфкатьлелек – Казан» епархиясе мохтаҗларга ярдәм итү хезмәте хезмәткәрләре һәм волонтерлары, шулай ук «Казан әниләре» хәйрия оешмасы вәкилләре Казан балалар хосписында булдылар. Балаларга бүләк итеп кунаклар Казан шәһәренең Мәскәү изгеләре гыйбадәтханәсе территориясендәге хәйрия тегү остаханәсендә тегелгән корама юрганнар тапшырдылар.

Хәйрия остаханәсе эшен «Һәр йортка шәфкатьлелек» проекты кысаларында оештырдылар, ул гражданлык җәмгыятен үстерүгә Татарстан Республикасы грантлары конкурсында җиңүче булды. Грант акчасына тегү һәм чигү машиналары һәм башка җиһазлар сатып алдылар.

Быел гыйнвар ахырында Казанда яшәүче 20 хатын-кыз тегү эшенә өйрәнгән һәм юрганнар, карават, кием-салым һәм тукымадан сувенирлар ясый башлаган. Бу әйберләр хәйрия ярминкәләрендә сатыла, мохтаҗ кешеләргә, социаль учреждениеләр карамагындагы кешеләргә тапшырыла.

«Безнең осталарның куллары белән ясалган унбиш юрган балалар хосписына тапшырылды. Одеяллар ачык, күзләрне шатландыра торган булып чыкты. Безнең осталар эшкә иҗади якын килделәр, үз хезмәтләренә тырышлык кына түгел, ә мәхәббәт һәм кайгыртучанлык та салдылар», – дип билгеләп үтте проект координаторы Елена Кәримова.

Шулай ук укыгыз

Барлык яңалыклар