Галләмов исемендәге Казан мәктәбендә тәрбияләнүчеләр өчен чәчтараш сәнгате буенча мастер-класс үткәрелде

«Профессия белән танышу» дәресе «Игелекле эшләр көне» хәйрия фонды проекты кысаларында узды.

Фото: Марат Мугинов

(Казан шәһәре KZN.RU, 1-нче октябрь). Казанда Н.А.Галләмов исемендәге республика махсус гомуми белем бирү мәктәбендә тәрбияләнүчеләр өчен чәчтараш сәнгате буенча мастер-класс үткәрелде. «Профессия белән танышу» дәресе «Игелекле эшләр көне» хәйрия фонды проекты кысаларында узды.

Танылган Казан салонының мастерлары һәм стилистлары балаларга үз эшләренең үзенчәлекләре, һөнәргә килү юллары турында сөйләделәр. Белгечләр клиентлар белән ничек эшләргә кирәклеге турында үз серләре белән уртаклаштылар, төрле техникаларда чәч кисү ничек башкарылуын күрсәттеләр. Чәчтарашлар хезмәтеннән балалар үзләре дә файдалана алды. 30-дан артык тәрбияләнүче очрашудан яңа прическалар белән китте.

Моннан тыш, «Авыр тормыш хәлендә калган балаларга ярдәм» фонды гранты ярдәме белән мәктәптә «Ярдәмчедән мастерга» проекты тормышка ашырыла. Махсус җиһазландырылган кабинетларда тәрбияләнүчеләр столяр осталыгына, кулинариягә, тегүгә, чигүгә өйрәнәләр. Бер ел элек монда шулай ук чәчтараш кабинеты барлыкка килде, дип хәбәр итә «Игелекле эшләр көне» хәйрия фонды матбугат хезмәте.

Шулай ук укыгыз

Барлык яңалыклар