Казан ата-аналары өчен Азык-төлек һәм социаль туклану департаменты буенча экскурсия уздырдылар

Очрашу «Мама в теме» проекты кысаларында узды.

(Казан шәһәре KZN.RU, 24-нче июль). Казанда «Мама в теме» проекты кысаларында мәктәп укучыларының ата-аналары белән чираттагы очрашу узды. Казанның Азык-төлек һәм социаль туклану департаменты генераль директоры Рима Мөхәммәдшина әниләр өчен туклану комбинаты цехлары буйлап экскурсия үткәрде һәм складларга керә торган чималның һәм әзер продукциянең сыйфатын ничек тикшерүләре турында сөйләде.

Очрашу барышында ата-аналар мәктәптә туклануга карата куелган таләпләр турында фикер алыштылар. Әниләргә яңа уку елына меню проекты тәкъдим ителде, алар анда кергән яңа ризыкларны авыз итеп карады.

Кире элемтә формаларына аерым игътибар бирелде, алар ярдәмендә ата-аналар балаларын тукландыруны контрольдә тота алалар. Аларга «Поел и доволен» мобиль кушымтасы, ата-аналар контроле журналлары, кайнар линия телефоны һәм башка мөмкинлекләр керә.

Департаментта аңлатуларынча, укучыларның теләкләрен исәпкә алып, ит ярымфабрикатлары - котлет һәм тефтельләр җитештерү технологиясен яңадан караганнар. Моннан тыш, менюда мондый ризыклар азайды – аларны кош һәм сыер итеннән пешерелгән ризыкларга алыштырдылар.

Дегустациядән соң әниләр анкетада һәр ризыкка бәя бирделәр һәм мәктәптә туклану сыйфатын яхшырту буенча үз тәкъдимнәрен калдырдылар.

«Мама в теме» проектына @depta.kzn аккаунтына язып, кушылырга мөмкин.

Шулай ук укыгыз

Барлык яңалыклар