Әңгәмәләр клубы һәм арт-лаборатория: акыл ягыннан тайпылышлары булган яшүсмерләр өчен «Крылья» үзәгендә дәресләр оештыралар

Программа июнь һәм август айларында узачак, теркәлү кирәк

Июнь һәм август айларында Казанда «Крылья» мультиформат үзәгендә акыл ягыннан үзенчәлекләре булган яшүсмерләр өчен дәресләр оештыралар. 16 яшьтән өлкәнрәк балалар «Кино, домино» дискуссия клубына, шулай ук мультимедия һәм театр педагогикасы буенча дәресләргә йөри алачак.

Атна саен июнь аенда инклюзив үзәктә сөйләм ягыннан актив яшүсмерләр өчен «Кино, домино» һөнәри юнәлешле әңгәмәләр клубы катнашучылары җыелачак. Алар тема буенча аудиокүренмәле эчтәлек караячак, ә соңыннан аның турында фикер алышачак. Белгечләр балаларга материалны диалоглар һәм тестлар аша беркетергә ярдәм итәчәк. Аралашуны үстерү өчен белгечләр өстәл уеннары оештыра.

Дәрестән соң яшүсмерләр киләсе дәрестә катнашу өчен кирәкле биремне алачаклар. Атнаның көнен һәм вакытын төркем җыеп, катнашучыларны теркәгәннән соң билгеләячәкләр.

Августта сөйләм ягыннан актив яшүсмерләр «Җәйге пикниклар» арт-лабораториясенә, мультимедия һәм театр педагогикасы буенча дәресләргә йөри алачак. Балалар белән ике юнәлештә эш оештыралар: театр (хәрәкәт, сөйләм, пластика) һәм аудиокүренмәле (кадр һәм тавыш, титрлар һәм яктылык белән эшләү). Дәресләр җәдвалы һәм эчтәлеге төркем җыйганнан һәм әңгәмә узганнан соң формалаштырылачак.

«Игелекле Казан» АКО хәбәр иткәнчә, клубта һәм арт-лабораториядә дәресләр төркем форматында, парларда һәм индивидуаль рәвештә узачак. Теркәлү сылтама буенча мөмкин.

Проект Татарстан Республикасы Рәисе гранты хисабына гамәлгә ашырыла.

Элегрәк хәбәр ителгәнчә, җәйге чорда Казанның дүрт инклюзив үзәгендә сәламәтлек мөмкинлекләре чикләнгән балалар өчен лагерь сменалары узачак, шул исәптән яңа «Вместе» инклюзив үзәгендә. Моннан тыш, балалар өчен «Глаголица» әдәби сменасында катнашу өчен конкурс игълан ителгән.

Шулай ук укыгыз

Барлык яңалыклар