«Апуш» балалар театр студиясе үзенең туган көне уңаеннан ачык дәрес тәкъдим итте

Анда төркемнең 300 тәрбияләнүчесе катнашты

Фотоны Тел мәдәнияте өлкәсендә милли сәясәтне гамәлгә ашыру бүлеге тарафыннан тәкъдим ителде

Казанның «Сәйдәш» мәдәни үзәгендә «Апуш» балалар татар театр студиясе үзенең дүрт еллыгын ачык дәрес белән билгеләп үтте. Анда студиядә тәрбияләнүче 300 бала катнашты.

Ачык дәрес «Апуш» студиясе гимнын башкарудан башланды. Чара башында «Сәйдәш» мәдәни үзәгендә тәрбияләнүчеләр чыгыш ясады, анда студиянең беренче төркеме ачылды. Остазлары – Татарстанның атказанган артисткасы Резеда Сәлахова белән балалар сәхнәдә сөйләм дәресе күрсәттеләр. Калган төркемнәр сәхнә хәрәкәте, җыр һәм актерлык осталыгы буенча дәресләр тәкъдим иттеләр. Бизәлгән сәхнәгә һәр төркемне коллектив җитәкчесе Алия Фәйзрахманова чакырды.

Чара «Мозаффаров-band» инструменталь ансамбле башкаруында тере музыка астында узды. Анда катнашучылар – М.Мозаффаров исемендәге 18 нче балалар музыка мәктәбе укучылары һәм укытучылары..

Татарстан Дәүләт Советы Рәисе урынбасары Марат Әхмәтов, Татарстан Дәүләт Советының Мәгариф, мәдәният, фән һәм милли мәсьәләләр комитеты рәисе Айрат Зарипов, Татарстан Дәүләт Советының Бюджет, салымнар һәм финанслар комитеты рәисе урынбасары Камил Ногаев, Казан шәһәре муниципаль берәмлеге башлыгы урынбасары Гүзәл Сәгыйтова, шулай ук «апушлыларның» якын дусты Әлфия Миңнуллина, Туфан Миңнуллин кызы.

Ачык дәрес азагында Марат Әхмәтов «Апуш» студиясен дүрт еллык юбилее белән котлады һәм үзенең тәэсирләре белән уртаклашты: «Без бит артистларның чыгышларын сәхнәдә генә күрергә күнеккәнбез, ә бүген сәхнә артында нинди фидакарь хезмәт торуын күреп чын-чынлап гаҗәпләндем. Педагогларга, балаларга һәм аларның әти-әниләренә зур рәхмәт. Мин тагын бер тапкыр безнең милли кодның бик көчле булуына инандым. Әлбәттә, мондый театр студияләрен Чаллыда, Әлмәттә, Түбән Камада да күрәсе килә».

Чара барышында студия остазларына Казан Мэрының Рәхмәт хатлары тапшырылды, дип хәбәр иттеләр Казан Башкарма комитеты аппаратының Тел мәдәнияте өлкәсендә милли сәясәтне гамәлгә ашыру бүлегендә.

Балалар өчен бу көнне танылган татар эстрадасы артисты Илнат Фәрхуллин катнашында бәйрәм дискотекасы оештырылды.

Элегрәк хәбәр ителгәнчә, 2025 елда Казанда «Апуш» театр студиясе дүрт яңа спектакль чыгарды.