«Апуш» татар балалар театр студиясе яңа спектакль әзерләү өчен 250 мең сум акча отты

РФ халык артисты Сергей Безруков яшь актерларны «Театраль Идел буе» фестивалендә җиңүләре белән котлады һәм аларны Мәскәүгә чакырды.

Фото: Тел культурасы өлкәсендә милли сәясәтне гамәлгә ашыру бүлеге

(Казан шәһәре KZN.RU, 25 нче апрель). «Апуш» татар балалар театр студиясе Пермьдә «Театраль Идел буе» балалар һәм яшьләр театр коллективлары фестивален бүләкләү тантанасында «Апушның тылсымлы төшләре» спектаклен күрсәтте. Конкурста җиңгән өчен студия яңа спектакль әзерләү өчен 250 мең сум күләмендә грант алды.

Россиянең халык артисты, Россиянең Дәүләт премиясе лауреаты, Мәскәү Губерна театрының сәнгать җитәкчесе Сергей Безруков та җиңүчеләрне котлады, Мәскәүгә кунакка чакырды. «Барыгызны да әлеге фестивальдә сәламләвемә бик шатмын. Фестивальнең җиңүчеләрен зур өметләр белән үзебезнең зур балалар фестивалендә көтәчәкмен. Безнең актерлык остаханәләрендә катнашырлар һәм Мәскәү Губерна театры сәхнәсендә спектакльләрен күрсәтерләр дип өметләнеп калам. Очрашканга кадәр!» – дип теләкләрен җиткерде.

26 нчы апрельдә студия шәкертләре Татарстан Рәисе катнашында Муса Җәлил исемендәге Татар академия дәүләт опера һәм балет театрында узачак Туган тел көненә багышланган тантаналы чарада катнашачаклар, «Апушның тылсымлы төшләре спектакле»нән өзек күрсәтәчәкләр, дип хәбәр итә Казан Башкарма комитетының тел культурасы өлкәсендә милли сәясәтне гамәлгә ашыру бүлеге.

Исегезгә төшерәбез, «Апушның тылсымлы төшләре» спектакле «Театраль Идел буе» фестивалендә «Иң яхшы балалар спектакле» дип танылды. Бу – Татарстанның әлеге конкурста беренче җиңүе. Финалда төрле жанрларда барлыгы 28 спектакль тәкъдим ителгән.

Шулай ук укыгыз

Барлык яңалыклар