Казанның 63 нче номерлы балалар бакчасы һәм 65 нче номерлы мәктәбе «Россиянең иң яхшы инклюзив мәктәбе» конкурсы финалистлары булдылар

Ярышларның йомгаклау этабы Мәскәүдә 26-28 нче октябрьдә узачак, илнең 41 төбәгеннән 60 учреждение җиңү өчен көрәшәчәк.

Фото: Денис Гордийко

(Казан шәһәре KZN.RU, 12 нче октябрь). Вахитов районының 63 нче номерлы балалар бакчасы һәм Казанның Мәскәү районының 65 нче номерлы мәктәбе «Россиянең иң яхшы инклюзив мәктәбе» бөтенроссия конкурсының финалистлары булдылар. Мәгариф учреждениеләре конкурсның соңгы этабында җиңү өчен көрәшәчәк, ул Мәскәүдә 26-28 нче октябрьдә узачак.

Конкурсның региональ этабы август ахырында тәмамланды, анда катнашу өчен илнең 62 төбәгеннән 226 оешма гариза биргән. Беренче сынауларда җиңүчеләр федераль дәрәҗәдә читтән торып үткәрелгән икенче этапка уздылар. Ярышлар 11 нче сентябрьдән 10 нчы октябрьгә кадәр булды. Жюри инклюзив практикалар һәм учреждениеләрнең педагогик технологияләре кейсларын бәяләде. Ярышлар нәтиҗәләре буенча 63 нче номерлы балалар бакчасы һәм Казанның 65 нче номерлы мәктәбе һәр номинациядә 20 җиңүче арасына керде. Конкурс финалында илнең 41 төбәгеннән 60 учреждение катнашачак.

Җиңүчеләрне өч номинациядә билгеләячәкләр: иң яхшы инклюзив балалар бакчасы, иң яхшы инклюзив мәктәп һәм балаларның ялын һәм сәламәтләнүен оештыру буенча иң яхшы инклюзив оешма. Конкурс нәтиҗәләре 28 нче октябрьдә билгеле булачак, дип хәбәр итә ТР Мәгариф министрлыгы матбугат хезмәте.

«Россиянең иң яхшы инклюзив мәктәбе» бөтенроссия конкурсы 2013 елдан бирле үткәрелә. Бу вакыт эчендә анда 1356 мәгариф оешмасы һәм 28 балалар ялы һәм аларны сәламәтләндерү оешмалары катнашкан. Ярышларны Россия Мәгариф министрлыгы һәм Мәскәү дәүләт психология-педагогика университеты оештырды.

Шулай ук укыгыз

Барлык яңалыклар