Казан шәһәр Думасы депутатлары чистарту корылмаларында төзелеш һәм ремонт эшләренең барышы белән таныштылар

Канализациянең биологик чистарту корылмаларын реконструкцияләү ике этапта бара, аны 2024 ел ахырына тәмамларга планлаштыралар.

Фото: Казан шәһәр Думасы

(Казан шәһәре KZN.RU, 7 нче июнь). Казан шәһәр Думасы депутатларының эш төркеме шәһәрнең илкүләм проектларын тормышка ашыруда мәгълүмат бирү һәм ярдәм итү комиссиясе эшчәнлеге кысаларында күчмә киңәшмә уздырды. Депутатлар канализациянең биологик чистарту корылмаларын реконструкцияләү эшләренең барышы белән танышты. Алар «Экология» илкүләм проектының «Иделне савыктыру» федераль проекты һәм чистарту корылмаларын төзү һәм реконструкцияләү буенча региональ программа кысаларында алып барыла.

Канализациянең биологик чистарту корылмаларын реконструкцияләүгә барлыгы 6,3 млрд сумнан артык акча бүлеп бирелгән, шуларның 5,1 млрд сумы – федераль бюджеттан. «Объектта эшләр ике этапта бара һәм аларны 2024 ел ахырына тәмамларга планлаштыралар. Быел реконструкция өчен 1 млрд 855 млн сум бүлеп бирелгән», – дип хәбәр итте «Водоканал» предприятиесенең эшләр идарәсе башлыгы Эльвира Ливада. Реконструкция тәмамланганнан соң, атмосферага чыгарылган зарарлы матдәләр саны, шулай ук Иделгә пычраткыч матдәләр ташлау кимиячәк.

ТР Дәүләт Советы һәм Казан шәһәр Думасы депутаты Рөстәм Габделхаков башкарылган эшләрнең чистарту корылмаларының бүгенге эшчәнлегенә ничек йогынты ясавына игътибар итте. «Реконструкция эшләре параллель рәвештә башкарыла һәм шәһәрлеләрнең көндәлек тормышына берничек тә комачауламый. Шулай ук 25 корылмада һәм һава чистарту системасында түбәләр урнаштыру аркасында якын-тирә бистәләрдә яшәүчеләр начар искә азрак зарлана башлады», – дип билгеләп үтте ул.

Казан шәһәр Думасы депутаты Виталий Белобородов объектның яңа икътисади шартларда эшләргә әзерлеге мәсьәләсен күтәрде. Ул кирәкле җиһазлар белән тәэмин итүдә кыенлыклар бармы, дип кызыксынды. «Проектны гамәлгә ашыру өчен күрсәтелгән һәм түләнгән чит ил җиһазлары объектка куелачак. Чит ил җиһазларына килгәндә исә, Россия аналогларына күчү өлешендә проект-смета документларына төзәтмәләр кертү планлаштырыла», – дип хәбәр итте Э.Ливада.

Очрашу ахырында депутатлар «Водоканал» вәкилләре белән канализациягә агызыла торган көнкүреш калдыкларына кагылышлы мәсьәләләр буенча гражданнар белән агарту эшләре алып бару турында фикер алыштылар. «Чистарту корылмаларында җыелган чүп-чарда шәхси гигиена чаралары, төзелеш чүп-чары һәм хәтта кием-салым да табыла», – диде Казан шәһәр Думасы депутаты Илдар Низаметдинов. Ул канализациягә еш ташлана торган товарларның махсус маркировкасын төзергә тәкъдим итте.

Исегезгә төшерәбез, илкүләм проект буенча һәр объектны гамәлгә ашыруга депутатлар беркетелгән, алар эшләрнең башкарылуын даими контрольдә тота. Илкүләм проектларның 70% ы төрле объектлар төзүгә һәм җиһазлар сатып алуга кагыла – алар депутатларга үзләренең сайлау округлары чикләрендә беркетелгән. Проектларның тагын 30% ы стратегик характерда – мәсәлән, 65 яшь һәм өлкәнрәк кешеләргә социаль-медицина хезмәтләре күрсәтү. Бу юнәлешләр профильле комиссия рәисләренә һәм аларның урынбасарларына, йә күрсәтелгән өлкәләрдәге тәҗрибәләре булган депутатларга беркетелгән.

Март башында Казан Мэры Илсур Метшин, канализациянең биологик чистарту корылмаларында булып, ремонт эшләренең барышы белән танышты, проектның Казан халкы өчен генә түгел, башка шәһәр һәм төбәкләр өчен дә зур әһәмияткә ия булуын билгеләп үтте.

Шулай ук укыгыз

Барлык яңалыклар