Казан шәһәре Думасы депутатлары Казанда яңа балалар бакчалары төзелеше барышын бәяләделәр

Объектлар илкүләм проектларны гамәлгә ашыру кысаларында төзелә һәм югары әзерлек дәрәҗәсендә тора.

(Казан шәһәре KZN.RU, 5-нче июль). Бүген Казан шәһәре Думасы депутатлары Казанда Завойский, Родина һәм Профессор Камай урамнары буенча урнашкан балалар бакчалары төзелешенең барышы белән таныштылар. Объектлар илкүләм проектларны гамәлгә ашыру кысаларында төзелә һәм югары әзерлек дәрәҗәсендә тора.

Россия Федерациясе Президентының «2024 елга кадәр Россия Федерациясе үсешенең милли максатлары һәм стратегик бурычлары турында» 2018 елның 7-нче маеннан 204-нче номерлы Указы нигезендә социаль-икътисади үсешнең 12 юнәлеше буенча милли проектлар эшләнде. Татарстан Республикасы башкаласы Казанда аларны гамәлгә ашыру буенча зур эш башкарыла. Шулай итеп, бүген депутатлар караган балалар бакчалары «Демография» милли проекты кысаларында төзелә. Инде быел ук алар мәктәпкәчә яшьтәге балалар өчен үз ишекләрен ачачак. Шәһәр Думасы депутатлары төзелеш барышын объектлар файдалануга тапшырылганчы тикшереп торачак.

Әлеге чарада ТР Дәүләт Советы Рәисе урынбасары Татьяна Ларионова җитәкчелегендә Татарстан Республикасында милли проектларны башкаруны контрольдә тоту төркеме, Казан Муниципаль берәмлеге башлыгы урынбасары Людмила Андреева, Казан шәһәре Думасы депутатлары Фәнис Нурмөхәммәтов, Нияз Гафиятуллин, Ләйлә Гарифуллина, Рөстәм Бакиров, Александра Карташова, шулай ук «Бердәм Россия» партиясенең Казан җирле бүлекчәсе башкарма секретаре Ольга Воронова һәм Казан Мәгариф идарәсе башлыгы Илнар Һидиятов катнашты.

Шулай ук укыгыз

Барлык яңалыклар