В целях анализа посещаемости и улучшения работы портала мы используем сервис «Яндекс.Метрика». Оставаясь на нашем портале, Вы выражаете свое согласие на обработку Ваших данных указанным сервисом.
Яңалыклар
02.09.2021, 18:27
Казан шәһәре Думасы депутатлары: «Сәламәтлекләре чикләнгән балалар белән эшләү буенча 78 номерлы лицей тәҗрибәсен таратырга кирәк»
Казанда инклюзив белем бирүне үстерүгә багышланган күчмә киңәшмә Идел буе районында узды.
Фото: Марат Мугинов
(Казан шәһәре KZN.RU, 2-нче сентябрь). Бүген Казан шәһәр Думасы депутатлары һәм «Өмет» хатын-кыз депутатлар берләшмәсе инклюзив белем бирү оештырылган уку йортларында булдылар. Аерым алганда, алар Идел буе районының 78-нче номерлы «Фарватер» лицее һәм «Кояшлы» мөмкинлекләре чикле балалар һәм яшүсмерләр өчен тернәкләндерү үзәге эше белән таныштылар. Күчмә киңәшмәне Казан шәһәр Думасы секретаре Альбина Рафикова үткәрде.
Лицей директоры Әлфия Урманчеева депутатларга экскурсия үткәрде һәм сәламәтлеге мөмкинлекләре чикләнгән балаларны укыту ничек оештырылуы турында сөйләде. Ул хәбәр иткәнчә, бүгенге көндә 1978 елда төзелгән бинада 1273 бала белем ала, шуларның 140-ы – сәламәтлеге мөмкинлекләре чикләнгән балалар, аларның 31-е инклюзив сыйныфларда белем ала.
«Инклюзив лицей – хәзер сирәк күренеш. Безнең сәламәтлек мөмкинлекләре чикле балалар да, башкалар кебек үк, тирәнтен белем ала. Әйтергә кирәк, алар бик яхшы нәтиҗәләр күрсәтәләр. Кагыйдә буларак, БДИны алар гади балаларга караганда яхшырак та язалар», – дип уртаклашты Әлфия Урманчеева.
Ул билгеләп үткәнчә, лицей ике тапкыр «Уңайлы мохит» федераль программасы буенча ярдәм алган, шуның нәтиҗәсендә анда лифт барлыкка килгән. «Бу безнең горурлыгыбыз, чөнки мондый иске конструкцияле мәктәпкә лифт кую шактый авыр», – диде лицей җитәкчесе һәм бинада мөмкинлекләре чикләнгән балалар өчен култыксалар, пандуслар һәм санузел җиһазландырылуын да өстәде.
Депутатлар берничә классны карадылар. Анда дәресләр узды, һәм кунаклар уку процессының ничек оештырылуын үз күзләре белән бәяли алдылар. Депутатларга сәламәтлек үзенчәлекләре булган укучыларга бер бинадан икенчесенә күчәргә мөмкинлек бирә торган махсус урындыклар күрсәттеләр. Алар һәр кабинетта бар.
Инклюзив сыйныфларның берсендә депутатлар мөмкинлекләре чикле балалар белән сөйләштеләр, алар үзләрен уңайлы хис итүләрен һәм укытучылар һәм сыйныфташлар ярдәме белән аеруча кыенлык кичермәүләрен әйттеләр. «Яхшы уку елы сезгә, ә иң мөһиме, дус һәм бердәм укуыгызны телим! Мәктәп еллары – ул иң яхшы вакыт. Өлкәнәерсез, һәм минем сүзләрне исегезгә төшерерсез. Өстәвенә, сез искиткеч мәктәптә укыйсыз, сезнең шундый яхшы укытучыларыгыз бар. Сезгә бәхет елмайган», – дип белдерде укучыларга депутат Людмила Андреева.
Күчмә киңәшмәдә катнашучылар шулай ук мәктәпнең диңгез флотына һәм су асты көймәләренә, шулай ук Бөек Ватан сугышына багышланган музейларында булдылар. Мәктәп экспозицияләре тарихы турында укучылар үзләре сөйләде. Мәсәлән, алар кунакларга Баренц диңгезендәге һәлакәттән соң лицейга тапшырылган сәгатьләрне күрсәттеләр, анда «Курск» атом су асты көймәсе баткан. «Мәктәп ТР диңгез җыены белән дуслык белән дан тоткан. Татарстанда беркайда да су асты флоты музее юк. Шуңа күрә без моны мәгарифкә дә кертергә кирәк дигән карарга килдек. Шулай итеп бездә диңгез кадет сыйныфлары барлыкка килде. Алар укыйлар да, физик әзерлек тә узалар һәм үзлегеңнән белем алу белән шөгыльләнәләр. Безнең 120 кадет укучысы бар», – дип хәбәр итте Әлфия Урманчеева.
Депутатлар укытучыларга инклюзив сыйныфларда эшләү өчен махсус белем таләп ителү-ителмәве белән кызыксынды. Лицей директоры алар яңадан әзерлек уза дип җавап бирде – экспертлар турыдан-туры лицейга чакырыла һәм анда курслар үткәрәләр. Моннан тыш, 78-нче номерлы лицей укытучылары шундый дәрәҗәгә ирештеләр ки, үзләре дә бөтен илдән укытучылар белән тәҗрибә уртаклаша. «Без Россиянең 3 мең укытучысын укыттык инде. Бик күп гаризалар алабыз. Без грант оттык, һәм аның кысаларында бөтен илне диярлек йөреп, хезмәттәшләребезне укыттык», – диде ул.
Аннары депутатлар укучыларның ата-аналары белән очраштылар, аларны узган Белем көне белән котладылар һәм сәламәтлекләре чикләнгән балалар укый торган беренче сыйныф бүлмәләренә үттеләр. Кунаклар яңа гына укучылар булучыларга җиңел уку, бик яхшы билгеләр теләделәр һәм бүләкләр тапшырдылар. Депутатлар беренче сыйныф укучыларына «Дөнья Атласы» китабын тапшырдылар.
Экскурсия ахырында Казан шәһәре Думасы депутатлары психология, медицина ярдәме кабинетларын һәм сәламәтлекләре чикләнгән балалар өчен спорт залын карап чыктылар. Әлфия Урманчеева, лицейның җиһазландырылуына карамастан, проблемалар кала, дип билгеләп үтте. Мәктәптә биналар җитешми. «Безгә ашханә, спорт мәйданчыклары, бассейн, актлар залы җитми. Без тулы кыйммәтле робототехника кабинеты ясый алмыйбыз, чөнки мөмкинлекләре чикләнгән балалар анда уза алмый, аларга иркенрәк кабинетлар кирәк. Проблеманың чишелеше янкорма булырга мөмкин. Һәм быел безне Казан Мэры Илсур Метшин ишетте, ул ярдәм итәргә вәгъдә итте», – дип сөйләде лицей директоры.
«Без сезнең белән бер дулкында. Безнең чакырылыш яшь, яңа, барысы да актив һәм инициативалы. Без мөмкинлекләре чикле балалар өчен нинди эшләр башкарылуын аңлыйбыз, шуңа күрә мондый укучыларның ата-аналарына ярдәм итүгә игътибар бирәбез. Хәзер без моның белән ныклап шөгыльләнәбез, әти-әниләр белән очрашабыз, аларга ярдәм итәбез, онлайн-консультацияләр һәм очрашулар уздырабыз, монда безгә «Ышаныч» психологик ярдәм үзәге ярдәм итә. Рәхмәт сезгә кылган эшләрегез өчен! Сезнең инициативаларны карарга һәм ярдәм итәргә әзер булачакбыз. Сезнең лицей – уку учреждениеләренә ничек эшләргә кирәклегенең ачык мисалы, һәм бу тәҗрибәне без таратырга тиеш», – дип йомгаклады Казан шәһәре Думасы секретаре Альбина Рафикова.
Шулай ук депутатлар Р.Зорге, 103 адресы буенча урнашкан «Кояшлы» мөмкинлекләре чикләнгән балалар һәм яшүсмерләр өчен тернәкләндерү үзәгендә булдылар. Үзәк директоры Рөстәм Әхмәдуллин сөйләвенчә, объект 1993 елның декабрендә мөмкинлекләре чикләнгән балалар тәрбияләүче гаиләләрнең проблемаларын комплекслы хәл итү өчен ачылган. Һәр көнне үзәккә 97 бала йөри, хезмәткәрләрнең штатында 74 кеше – социаль эшләр буенча белгечләр, дефектологлар, укытучы-логопедлар, психологлар, медицина хезмәткәрләре.
«Безнең үзәкнең өстенлеге шунда ки, реабилитация үткән вакытта балалар 78-нче номерлы лицейның коррекция классларында белем ала», – диде ул. Рөстәм Әхмәдуллин очрашуда катнашучыларны монда күрсәтелә торган хезмәтләр, техник җиһазлар белән таныштырды һәм тәрбияләнүчеләрнең уңышлары турында сөйләде. Депутатлар инвалидлар һәм халыкның аз хәрәкәтләнүче башка төркемнәре өчен уңайлы шартлар булуны бәяләделәр, «Тозлы мәгарә» бинасына игътибар иттеләр. Ул «Балалар – балаларга» проекты кысаларында 2018 елда Казан шәһәренең 19-нчы номерлы гимназия укучылары тарафыннан игелек ярминкәсендә җыелган акчага җиһазландырылган иде.
Моннан тыш, депутатлар мөмкинлекләре чикләнгән балалар укый торган уку сыйныфларында булдылар, аларны уку елы башлану белән котладылар, бүләкләр тапшырдылар. Казан шәһәре Думасы секретаре Альбина Рафикова 78-нче номерлы лицей һәм «Кояшлы» тернәкләндерү үзәге директорларына балалар белән генә түгел, гаиләләр белән дә бәяләп бетергесез эш алып барганнары өчен рәхмәт белдерде. Ул билгеләп үткәнчә, аларның катлаулы тормыш ситуациясенә җайлашуы балаларны укыту һәм тәрбияләүнең иң мөһим аспекты булып тора, һәм бу учреждениеләр белән алга таба хезмәттәшлек итүгә өмет белдерде.
Фоторепортаж
Казан шәһәре Думасы депутатлары 78-нче номерлы лицейда булдылар
Шулай ук укыгыз
-
24.07.2025, 12:00 -
24.07.2025, 11:22 -
23.07.2025, 17:46 -
23.07.2025, 17:27