Яшьләр көнен Казан елга порты янындагы зур күләмле фестиваль белән билгеләп үтәчәкләр

Бәйрәм кунаклары өчен бай эчтәлекле программа әзерләнгән.

(Казан шәһәре KZN.RU 24-нче июнь, Алинә Бережная). 27-нче июньдә Казанда Яшьләр көнен билгеләп үтәчәкләр. Быел елга порты янындагы территория бәйрәм итү өчен үзәк мәйданчык булачак. Бу хакта бүген Казан Башкарма комитетында узган эшлекле дүшәмбе киңәшмәсендә Балалар һәм яшьләр эшләре комитеты рәисе Айрат Фәизов сөйләде.

Бәйрәм кунаклары өчен бай эчтәлекле программа әзерләнгән. Шулай итеп, мәйданда стритбол, урам биюләре, граффити, скейтбординг, лаундж-зона өчен зоналар оештырылачак. Биредә үк мәгариф лекторий узачак.

Мәйданда яшь башкаручыларның музыкаль конкурсы була, анда Казан музыка төркемнәре чыгыш ясаячак. ТНТ Terry-да «Песни» тамашасының беренче сезоны җиңүчесе (Олег Терновой), Россиянең танылган DJ Kashin һәм «Нервы» төркеме фестивальнең хедлайнерлары булачак.

«Әлеге урын яшьләр арасында популяр булып тора һәм мондый форматтагы чараны уздыру өчен туры килә. Без фестивальдә 10 меңнән артык кеше катнашыр дип көтәбез», – диде А.Фәизов. Фестиваль ТР Яшьләр эшләре министрлыгы тарафыннан Казан Мэриясе белән берлектә үткәрелә.

Шул ук көнне «Мәскәү» мәдәни үзәгендә дәүләт яшьләр сәясәте өлкәсендә кадрларга ярдәм итү буенча «Бер дулкында» республика премиясен тапшыру булачак, шулай ук Казанның яшьләр сәясәте белгечләре һәм активистлары бүләкләнәчәк. А.Фәизов сөйләгәнчә, әлеге чара Татарстанның дәүләт яшьләр сәясәтенең 25 еллыгына багышлана.

Башкарма комитет җитәкчесе Денис Калинкин Казанда булачак яшьләргә зур игътибар бирелүен, программалар эшләнүен һәм уңайлы үсеш өчен барлык шартлар тудырылуын билгеләп үтте. «Безнең шәһәрдә яшь буынның төрле тармакларда һәм төрле өлкәдә үз сәләтләрен һәм амбицияләрен тормышка ашыру өчен мөмкинлекләр бар. Республика һәм муниципаль программаларның яртысы – балалар һәм яшьләр өчен, алар арасында балалар бакчалары, мәктәпләр, яшүсмерләр клубларын, ә быелдан шәһәр читендәге ял лагерьларын төзү һәм капиталь ремонтлау бар. Ел саен шәһәрдә яңа балалар мәйданчыклары һәм уңайлы спорт ишегалды комплекслары барлыкка килә, ә җәмәгать киңлекләрендә яшьләр белән шөгыльләнү һәм ял итү өчен инфраструктура булдырыла», - диде Д.Калинкин һәм Казан – энергияле шәһәр, дип өстәде. «Безнең бурыч – яшьләргә үзләрен күрсәтү һәм ниятләрен тормышка ашыру өчен шартлар булдыру», - диде ул.