Казанда WorldSkills чемпионаты: кондитер, флорист һәм станокта эшләүчене нәрсә берләштерә

Бүген «Казан Экспо» күргәзмә комплексында чемпионатка багышланган махсус медиатур узды.

(Казан шәһәре KZN.RU, 21-нче август, Алена Мирошниченко). WorldSkills Kazan 2019 һөнәри осталык буенча дөнья чемпионатында катнашучылар өчен «Матбугатта басма технологияләр» компетенциясе өчен 150 мең кәгазь бите, «Сантехника һәм җылылык» компетенциясе өчен 30,4 мең винт, «Ресторан сервисы» компетенциясе өчен 1 мең коктейль таякчыгын сатып алганнар. Бүген «Казан Экспо» күргәзмә комплексында узган медиатурда WorldSkills Champion Trust-та Европа вәкиле, Бразилиядә 2015 елгы WorldSkills чемпионатында катнашучы Анна Прокопеня кызыклы фактлар китерде.

Ярышлар Татарстан башкаласында иртәгә, 22-нче августта ачылачак, - 23-26 август көннәрендә яшь профессионаллар «Казан Экспо» күргәзмә комплексында үз осталыкларын күрсәтәчәкләр. Дөньяның 63 иленнән 1300 катнашучы 56 компетенциядә ярышачак. Тулаем алганда, алар 6 блокка бүленгән: төзелеш һәм төзелеш технологияләре, иҗат һәм дизайн, хезмәт күрсәтү өлкәсе, мәгълүмати һәм коммуникацион технологияләр, җитештерү һәм инженерлык технологияләре, транспорт һәм логистика.

А.Прокопеня сөйләп үткәнчә, чемпионатта катнашучыларның барысы өчен дә чыгышларда кирәк булачак җиһазларга 24412 заказ ясалган. Гаризалар арасында 24,8 мең кирпеч, 1944 бокал, пешекчеләр өчен 450 кәгазь баш киеме, 24838 өр-яңа чәчәк, 22 дрон, 2 вертолет һәм 35 мең метр электрон кабель бар. Шул ук вакытта заказларда катнашучылар өчен һәр компетенциядә да кирәк булган пунктларны табарга мөмкин. Кондитерга да, флористка да, станокта эшләүчегә дә ут сүндергеч, каләм һәм кофемашина кирәк.

Исегезгә төшерәбез, WorldSkills Kazan 2019 дөнья чемпионатын ачу тантанасы иртәгә «Казан Арена» стадионында узачак. Кунакларны зур тамаша көтә, биредә Россия эстрадасы йолдызлары, Казанның, Татарстан Республикасының иҗат коллективлары катнашачак. Моннан тыш, аның куелышында өстәмә чынбарлык технологияләре дә җәлеп ителәчәк.

Шулай ук укыгыз

Барлык яңалыклар