Казан хисапчылары Бөтенроссия гамәли конференциясендә катнашырга чакырыла

Россия Финанс министрлыгының һәм Федераль салым хезмәтенең әйдәп баручы белгечләре, аудиторлар һәм практиклар бухгалтерияне үзгәрешләргә ничек әзерләргә һәм бәхәсләрне, штрафларны ничек булдырмаска кирәклеге турында сөйләячәкләр.

(Казан шәһәре KZN.RU, 23-нче октябрь). 21-нче ноябрьдә Казанда «2020 елда бухгалтер исәбе һәм салымнар: хисап революциясе, яңа мөмкинлекләр һәм чикләүләр» VIII Бөтенроссия гамәли конференциясе узачак. Быел конференция бер үк вакытта Россиянең 20 төбәгендә, шул исәптән ТР башкаласында да узачак. Анда Россия Финанс министрлыгының һәм Федераль салым хезмәтенең әйдәп баручы белгечләре, аудиторлар һәм практиклар 2020 елдан бирле эштә исәпкә алынырга тиешле үзгәрешләр турында сөйләячәкләр, бухгалтерияне үзгәрешләргә ничек әзерләргә, бәхәсләрне һәм штрафларны ничек булдырмаска кирәклеге турында киңәшләр бирәчәкләр.

Белгечләр бухгалтер исәбендәге һәм хисаплылыктагы яңалыклар, физик затлар кеременә салым исәпләүдәге үзгәрешләр турында сөйләячәкләр, электрон хезмәт кенәгәләре белән эшләү турында аңлатмалар бирәчәкләр.

Үзгәрешләр үзенчәлекләре һәм аларны практикада ничек кулланырга кирәклеге турында махсус чакырылган лектор, гамәлдәге 3-нче класслы РФ дәүләт киңәшчесе Сергей Разгулин сөйләячәк.

Конференция «Казан Ривьерасы» сәүдә-күңел ачу комплексында (Фатыйх Әмирхан проспекты, 1) узачак, дип хәбәр итә оештыручылар. Конференциядә катнашу бушлай.

Катнашу өчен сайтта яки сылтама буенча алдан теркәлү кирәк. Теркәлгәннән соң электрон почтага чарага керү билеты киләчәк.

Шулай ук укыгыз

Барлык яңалыклар