Донбасстан килгән ике йөздән артык баланы Казан янындагы «Молодежный» лагере кабул итәчәк

Алар өчен мастер-класслар, иҗат кичәләре һәм шәһәр буйлап экскурсияләр әзерләнгән

Фото: Денис Гордийко

(Казан шәһәре KZN.RU, 24 нче август). Бүген Биектау районында урнашкан Казанның «Молодежный» лагеренда Донецк, Луганск һәм Рубежноедан килгән балаларның чираттагы заезды узачак. 23 нче августтан 10 нчы сентябрьгә кадәр сәламәтләндерү лагеренда әлеге шәһәрләрдән барлыгы 208 бала ял итәчәк.

Балалар өчен «Подросток» МБУ һәм А.Гайдар исемендәге Казан яшьләр үзәге белән бергәлектә күңел ачу программасы әзерләнгән. Көн саен спорт чаралары һәм ярышлар, гамәли иҗат дәресләре узачак. Шулай ук ракета төзелеше һәм самолетларны модельләштерү буенча мастер-класслар, интеллектуаль квестлар һәм иҗат кичәләре, дискотекалар һәм гитара астында җырлар әзерләнгән. Моннан тыш, ял итүчеләрне Казан буйлап күзәтү экскурсиясе, Кремль буйлап йөрү, «Замбези елгасы» зооботаника бакчасына бару һәм бассейн дәресләре көтә.

«Ышаныч» үзәге психологлары балалар белән булачак, ә медицина ярдәме тәүлек әйләнәсе күрсәтеләчәк. Лагерьдагы һәр бала тикшерү узачак, шул исәптән теш табибында да.

«Молодежный» сәламәтләндерү лагеры «Ял» шәһәр үзәгенә керә, ул Казанның 10 лагерен берләштерә: «Молодежный»дан тыш, «Восток», «Заречье», «Спутник», «Юнитур», «Гагарин исемендәге», «Нармонка», «Татарстан пионериясе», «Бригантина», «Березка».

Күптән түгел KZN.RU Лисичанск һәм Рубежное шәһәрләрендә яшәүчеләргә унынчы гуманитар йөк җибәрелүе турында хәбәр итте. ТР башкаласы Донбасска беренче тапкыр яңа туган сабыйлар өчен кирәк-яраклар җибәрде.

Шулай ук укыгыз

Барлык яңалыклар