Казан пенсионеры мошенникларга ике атнадан артык акча күчереп торган

Хатын-кыз бөтен саклыкка җыйган акчасын төрле банкларның банкоматлары аша мошенниклар атаган счетларга күчергән.

Фото: Денис Гордийко

(Казан шәһәре KZN.RU, 24-нче сентябрь). Казан пенсионеры мошенникларга 5 млн сумнан артык акча күчергән. 84 яшьлек хатын-кыз «Мәскәү» полиция бүлегенә җинаятьчеләр белән аралашу башланганнан 20 көн узгач кына мөрәҗәгать иткән.

Бервакыт аңа үзен банк хезмәткәре дип таныштырган чит хатын-кыз шалтырата. Билгесез хатын хәбәр иткәнчә, зыян күрүченең счетыннан мошенниклар, ышанычнамә кулланып, акча салдыртмакчы була. Соңрак пенсионер хатынга үзен хокук саклау органы хезмәткәре дип атаган ир-ат шалтырата. Ул да чит хатын-кыз әйткән сүзләрне кабатлый, шулай ук, моның тикшерүгә комачаулык итәчәгенә сылтап, булган хәл турында беркемгә дә сөйләмәскә куша.

Пенсионер шалтыратучыларның сүзенә ышана. Ул 20 көн дәвамында алар белән элемтәдә тора. Җинаятьчеләр зыян күрүчегә барлык җыйган акчаларын «куркынычсыз счетларга» күчерергә тәкъдим итә. Алар күрсәтмәсе буенча, өлкән яшьтәге хатын-кыз барлык тупланмасын салдыра, ә аннары төрле банкларның банкоматлары аша аталган абонент номерларына һәм счетларына күчерә.

Акчаны алгач, җинаятьче пенсионерга электрон чек җибәрә, анда барлык күчерелгән акчалар «куркынычсыз счетларда» дип күрсәтелгән була. Карак тикшерү аркасында әлегә акчадан файдаланырга ярамау турында хәбәр итә. Шуннан соң пенсионер хатын берничә тапкыр мошенникка шалтырата, әмма тегесе акчаны кире кайтаруны кичектерә. Шул вакытта зыян күрүче барысы турында кызына сөйли, ул әнисенә полициягә мөрәҗәгать итәргә киңәш итә.

Шул рәвешле, зыян күрүчегә 5 млн сумнан артык матди зыян китерелгән. «Мошенниклык» маддәсе буенча җинаять эше кузгатылган, тикшерү алып барыла, дип хәбәр итә Россия Эчке эшләр министрлыгының Казан буенча идарәсе матбугат хезмәте.

Шулай ук укыгыз

Барлык яңалыклар