2026 елда 820 меңнән артык казанлыны тулы медицина тикшерүен узарга чакырырга планлаштыралар

Диспансеризацияне яшәү урыны буенча беркетелгән поликлиникада узарга мөмкин

Фото: Денис Гордийко

Казанда профилактик медицина тикшерүләре һәм диспансеризация уздыру буенча еллык кампания башланды. 2026 елда шәһәр сәламәтлек саклау учреждениеләре профилактик чаралар белән 820 меңнән артык кешене колачларга планлаштыра, дип хәбәр иттеләр Сәламәтлек саклау идарәсендә.

План нигезендә, 2026 елда өлкәннәрнең аерым төркемнәре өчен 512 мең 164 диспансеризация, 82 мең 495 профилактик тикшерү, 2 мең 288 тирәнтен күзәтү һәм 18 яшьтән 49 яшькә кадәргеләр өчен репродуктив сәламәтлекне карау планлаштырылган. Бу 820 меңнән артык профилактик чара бирә.

Чаралар исемлегенә стандарт диспансеризация, тирәнтен тикшерүләр һәм тикшерүләрнең яңа төре – 18 яшьтән 49 яшькә кадәрге гражданнар өчен репродуктив сәламәтлекне бәяләү кертелгән.

Диспансеризацияне яшәү урыны буенча беркетелгән поликлиникада узарга мөмкин. Агымдагы елда планлы диспансеризациягә 1987, 1990, 1993, 1996, 1999, 2002, 2005 һәм 2008 елларда туган казанлылар чакырыла. 40 яшьтән өлкәнрәкләр өчен диспансеризация яшькә карамастан ел саен үткәрелә.

Диспансеризация ике этапта уза. Беренче этап иң киң таралган онкологик авыруларга (сөт һәм простата бизләре, үпкә, юан эчәк яман шеше) скрининг уздыруны, шулай ук күрү, эндокрин һәм йөрәк-кан тамырлары системаларын тикшерүне үз эченә ала. Нормадан тайпылышлар ачыкланганда пациентны тар белгечләргә өстәмә тикшерү өчен җибәрәләр.

Табиблар ассызыклаганча, даими тикшерүләр хроник авыруларны иртә стадияләрдә, дәвалау нәтиҗәлерәк булганда ачыкларга мөмкинлек бирә.

Диспансеризация «Озын һәм актив тормыш» милли проектын гамәлгә ашыру кысаларында үткәрелә.

Исегезгә төшерәбез, Казанның Сәламәтлек саклау идарәсе мәгълүматлары буенча, узган ел эчендә диспансеризацияне 390 мең 377 шәһәр кешесе узган – бу 2024 елга караганда 31,3% ка күбрәк.

Шулай ук укыгыз

Барлык яңалыклар