Казанда яшәүчедән телефон мошенниклары 800 мең сумнан артык акчасын алдап алган

Зыян күрүче җинаятьчеләр белән 7 сәгать дәвамында аралашкан.

Фото: Марат Мугинов

(Казан шәһәре KZN.RU, 6-нчы октябрь). Казанлы үзләрен банк һәм хокук саклау органнары хезмәткәрләре дип таныштырган телефон мошенникларының корбаны булган.

28-нче сентябрь иртәсендә шәһәрле банк бүлекчәсендә була, үзенең финанс счетларын тикшерә. Өенә кайтып барганда аңа үзен банк хезмәткәре дип таныштырган билгесез кыз шалтырата, ул үзенең ир-атның мәгълүматларын ачыклаганын һәм мошенникларның аның счетыннан бөтен акчаларын алганын хәбәр итә. Шуннан соң зыян күрүчегә үзен хокук саклау органы хезмәткәре дип атаган бер ир шалтырата һәм банк караклыкларын тикшерүен сөйли. Тикшерүгә ярдәм итү өчен, җинаятьче ир-атка акчаны счеттан алырга тәкъдим итә.

Ир шалтыратучыга ышанып, аның күрсәтмәләрен үти – акчаларны ул атаган ике төрле банк счетына күчерә. Кылынган операцияләрдән соң, җинаятьче икенче көнне яңа счет рәсмиләштерү өчен шалтыратырга вәгъдә итә. Сөйләшү тәмамлангач, ир алданганын аңлый һәм полициягә мөрәҗәгать итә.

Зыян күрүче мошенниклар белән 7 сәгать дәвамында бер дә трубканы куймыйча элемтәдә була. Бу вакыт эчендә билгесез затлар аның 800 мең сумнан артык акчасын алдап алалар. Бу факт буенча «Восход» полиция бүлегендә мошенниклык билгеләре буенча җинаять эше кузгатылды, дип хәбәр итә Россия Эчке эшләр министрлыгының Казан буенча идарәсе матбугат хезмәте.

Алдауның иң киң таралган схемалары һәм алдакчыларның хәйлә-мәкерләренә ничек эләкмәскә икәнен сылтама буенча кереп укыгыз.

Шулай ук укыгыз

Барлык яңалыклар