Казанның туклану департаментында 500 тоннадан артык чимал һәм азык-төлек товарлары яраксызга чыгарылган

Балалар бакчаларында, мәктәпләрдә һәм оешма базасында санитария нормаларын үтәү буенча 1700 дән артык тикшерү уздырганнар

Узган ел Казанның азык-төлек һәм социаль туклану департаментының аккредитацияләнгән лабораториясендә 221 меңнән артык анализ үткәрелгән һәм 516 тонна кергән чимал һәм азык-төлек товарлары яраксызга чыгарылган. Шулай ук учреждениенең санитария контроле хезмәте департаментта, балалар бакчаларында һәм мәктәпләрдә санитария нормаларын үтәү буенча 1700 дән артык тикшерү уздырган. Мондый мәгълүматларны эшлекле дүшәмбедә оешманың генераль директоры Рима Мөхәммәдшина җиткерде.

Санитария нормаларыннан тыш, департамент туклануны оештыру стандартларына туры килүен тикшерә һәм мәктәп азык-төлек блогы персоналын өйрәтә. Мондый максатлар белән хезмәткәрләр узган ел 2 меңнән артык тапкыр чыкканнар.

Учреждениенең үз «Акыллы туклану» экосистемасы бар, анда департамент эше буенча мәгълүмат эшкәртелә, хәзер биредә 620 мең заказ, 12 меңнән артык төр тәэмин итү графигы, 4,7 мең килешү һәм 236 тәэмин итүче рәсмиләштерелгән. «1С» программасы базасында ашамлыклар исемлеген автоматлаштырылган рәвештә формалаштыру системасы кертелде, бу менюны исәпләү вакытын ике тапкырга кыскартырга мөмкинлек бирде. Мондый система нәтиҗәсендә хәтта заказлар саны артканда да, димәк, транспорт маршрутлары саны да, ике автомобиль бушаган.

Без аена 368 төр меню сатабыз, 57 берәмлек автотранспорт кулланабыз. Мондый күләмдәге мәгълүматны цифрлы технологияләрдән башка эшкәртеп булмый», – дип ассызыклады Рима Мөхәммәдшина.

Былтыр кире элемтә системасы базасына Казанның барлык балалар бакчалары кушылды (элек биредә бары тик мәктәпләр буенча гына мәгълүмат саклана иде). Бүгенге көндә программада 44 меңнән артык язма бар, бу теләкләргә, тәкъдимнәргә, кисәтүләргә оператив җавап бирүне тәэмин итәргә һәм туклануны оештырганда куркынычларны киметергә мөмкинлек бирә.

«Акыллы туклану» системасына хәзер департамент хезмәтләре дә тоташтырылган (хезмәтне саклау бүлеге, куркынычсызлык хезмәте һәм техник хезмәт). Шулай ук һәр мәктәптә, «Елмай» паркы кафесында һәм «Джуманджи» кафесында урнаштырылган QR-кодлар аша җиһазларга техник хезмәт күрсәтүгә гаризалар бирүнең яңа ысулы кертелгән. Биредә мәктәп ризыкларын көндәлек дегустацияләү буенча чек-битләр дә бар.