Ел башыннан бирле Казанда мотоциклчылар катнашында 40 тан артык юл-транспорт һәлакәте теркәлгән

Автоинспекторлар шәһәрдә, тавыш үлчәгечләр кулланып, рейдлар үткәрәчәк

Фото: Денис Гордийко

(Казан шәһәре KZN.RU, 8 нче август). Ел башыннан Казанда мотоциклчылар катнашында 43 юл-транспорт һәлакәте теркәлгән, анда ике кеше һәлак булган һәм 46 кеше тән җәрәхәтләре алган. Мондый хәлләрне кисәтү өчен 13 нче августка кадәр Татарстанда «Мотоцикл» оператив-профилактик чарасы узачак.

Автоинспекторлар мондый транспорт төрендә балалар һәм яшүсмерләр йөрүенә дә юл куймаячак. 16 яшьтән өлкәнрәк булган балигъ булмаган шофер мопед, скутер яки мотоцикл белән идарә иткән өчен административ җаваплылык каралган. Хокук бозучыга РФ Административ хокук бозулар кодексының 12.7 маддәсенең 1 нче өлеше буенча биш меңнән 15 мең сумга кадәр штраф яный. Шул ук вакытта транспорт чарасы махсус стоянкага урнаштырыла.

Әгәр машина йөртүче 16 яшьтән кечерәк булса, аның өчен законлы вәкилләр (ата-аналар яки опекуннар) җаваплы. Бу очракта РФ Административ хокук бозулар кодексының 5.35 маддәсе буенча административ җаваплылык каралган, ә транспорт чарасы махсус стоянкага урнаштырыла. Балигъ булмаган баланы профилактик исәпкә куярга мөмкиннәр.

Шулай ук тавыш үлчәү приборларын кулланып рейдлар планлаштырыла. РФ Административ хокук бозулар кодексының 8.23 маддәсе буенча тавыш нормаларын арттырган өчен кисәтү яки 500 сум күләмендә штраф рәвешендә административ җәза яный. РФ Административ хокук бозулар кодексының 12.5 маддәсенең 1 нче өлеше буенча автомобиль конструкциясенә үзгәрешләр кертү өчен дә шундый ук чаралар күреләчәк, дип искәртә Россия Эчке эшләр министрлыгының Казан буенча ЮХИДИ бүлеге.

Шулай ук укыгыз

Барлык яңалыклар