Казан сәнгать мәктәпләренең 4,2 меңнән артык укучысы конкурс лауреатлары һәм дипломантлары булды

6 яшьтән 15 яшькә кадәрге һәр өченче бала шәһәрнең музыка яки сәнгать мәктәбендә укый.

Фото: Марат Мөгыйнов

(Казан шәһәре KZN.RU, 28 нче март, Алинә Бережная). Казанда 6 яшьтән 15 яшькә кадәрге һәр өченче бала шәһәрнең музыка яки сәнгать мәктәбендә укый. 2021 елда сәнгать мәктәпләрендә тәрбияләнүче 4270 бала халыкара, бөтенроссия, төбәкара, республика һәм шәһәр конкурсларында лауреат һәм дипломант булдылар. Бу хакта бүген Казан Башкарма комитетының эшлекле дүшәмбесендә Мәдәният идарәсе башлыгы Азат Абзалов хәбәр итте.

Казанның яшь музыкантлары пианист Денис Мацуев химаясе астында узучы «Яңа исемнәр» хәйрия фонды конкурсында югары профессиональ әзерлек дәрәҗәсен һәм иҗади казанышларын күрсәттеләр. 14 нче номерлы балалар музыка мәктәбе укучысы Арина Сафиуллина һәм 5 нче номерлы балалар музыка мәктәбеннән Кирилл Миряшкин стипендиатлар булдылар.

Шәһәрдә Александр Сладковский, Симфоджаз-оркестр, Тынлы инструментлар оркестры патронажы астында Яшьләр симфоник оркестры кебек балалар җыелма коллективларын үстерү эше дәвам итә. «Коллективлар эре шәһәр чараларында катнашалар, шулай ук югары һөнәри казанышлар күрсәтәләр», – дип билгеләп үтте Азат Абзалов.

Шәһәр Мәдәният идарәсе башлыгы ел азагында Казан Мэрының исемле стипендиясенә ия булучыларны искә төшерде. Студентлар һәм аспирантлардан тыш аны яшь спортчыларга, музыка һәм сәнгать мәктәпләрендә тәрбияләнүчеләргә дә тапшырдылар. Бүләкләрне шәһәрнең сәнгать мәктәпләрендә белем алучы 15 сәләтле бала алды. Конкурста 25 мәктәптән 98 укучы катнашты, жюри әгъзалары Н.Г.Җиһанов исемендәге Казан дәүләт консерваториясенең, Әүхәдиев исемендәге Казан музыка көллиятенең, Фешин исемендәге Казан сәнгать училищесының иң яхшы педагоглары, ТР һәм РФ Рәссамнар берлеге әгъзалары булган.