3,7 меңнән артык казанлы метро станцияләре янында грипптан прививка ясатты

Мобиль бригададлар бу атнада эшли башлады.

Фото: Марат Мугинов

(Казан шәһәре KZN.RU, 18-нче сентябрь, Ксения Швецова). Бу атнада Казанда метрополитен станцияләре янында прививка ясый торган мобиль бригадалар эшли башлады. Бүгенгә бу пунктларда 3,7 меңнән артык шәһәр кешесе вакцинацияләнде, дип хәбәр итте «Татар-информ» мәгълүмат агентлыгында узган матбугат конференциясендә ТР сәламәтлек саклау министры урынбасары – ТР Сәламәтлек саклау министрлыгының Казан буенча идарәсе башлыгы Владимир Жаворонков.

«Метро станцияләре янында оештырылган пунктларда көненә уртача меңләп кеше прививка ясатты, – диде В.Жаворонков. – Соңгы тәүлек эчендә 757 кеше прививка кадатты, ә атна башыннан – 3767 кеше».

Мобиль бригадалар, һава шартлары уңай булганда, өч атна дәвамында сменалап эшләячәк, дип билгеләп үтте В.Жаворонков.

Исегезгә төшерәбез, шәһәр халкы көн саен 8.00 сәгатьтән 14.00 сәгатькә кадәр, 21-нче сентябрьдән 12.00 сәгатьтән 18.00 сәгатькә кадәр, 28-нче сентябрьдән 8.00 сәгатьтән 14.00 сәгатькә кадәр грипптан вакцинацияләнә ала. Прививканы 3-нче октябрьгә кадәр «Авиатөзелеш», «Яшьлек», «Кәҗә бистәсе», «Тукай мәйданы», «Сукно бистәсе», «Әмәт», «Җиңү проспекты» һәм «Дубравная» метро станцияләреннән чыгу юлларында ясатырга мөмкин. Вакцинация өчен үзең белән медицина битлеге, паспорт яки шәхесне раслаучы башка документ булырга тиеш. Прививка алдыннан табиблар тән температурасын үлчиләр һәм сәламәтлек торышын тикшерәчәкләр.

Киләсе сезонда грипптан 754 мең 435 кешене (яки казанлыларның 60 процентын) вакцинацияләү планлаштырыла, шуларның – 202 мең 530-ы бала һәм 551 мең 905-е өлкән кеше.

Шулай ук укыгыз

Барлык яңалыклар