2023 елда Казанның МПС-1 комплексында 3,5 мең тоннадан артык калдык сортланган

Сортлау күрсәткечләре 20% ка диярлек арткан

Фото: Марат Мөгыйнов

(Казан шәһәре KZN.RU, 18 нче гыйнвар). Казанның «ПЖКХ» идарәче компаниясенең МПС-1 комплексында 2023 елда 3583 тонна калдык сортланган – бу 2022 ел күрсәткечләреннән 20% ка диярлек күбрәк.

Эшкәртүгә 1128 тонна пыяла, 726 тонна ПЭТ-шешә һәм 449 тонна катыргы кәгазь җибәрелгән, дип хәбәр иттеләр регоператорның матбугат хезмәтендә.

Исегезгә төшерәбез, Васильченко урамындагы МПС-1 янында «Җыю ноктасы» пункты эшли, анда шәһәр кешеләреннән алга таба эшкәртү өчен төрле төрдәге икенчел чимал кабул итәләр. Макулатура, пластик, мебель, батарейка, техника, кием һәм башка әйберләр тапшырырга мөмкин.

Өстәвенә, хәзер шәһәр халкы Яңа ел ылыслы агачларын эшкәртүгә тапшыра ала. Гыйнвар ахырына кадәр шәһәрдә 20 дән артык икенчел чимал кабул итү пункты эшли, алар тулган саен чыршыларны МПС-1 калдыкларын сортлау комплексына чыгарачаклар. Җыелган агачлар шәһәрне төзекләндергәндә туфракка мүлчә җәю һәм җәяүлеләр юлларына салу өчен кулланылачак.

Көзен «ПЖКХ» ИК тузган шиннарны җыю буенча акция үткәрә. Аның нәтиҗәләре буенча регоператор утильләштерүгә 410 кубометрдан артык икенчел чимал тапшырган. Шәһәр халкының активлыгы аркасында шиннар, сортлауны узып, оешмаларга тапшырыла, биредә аларны төрле товарлар ясау өчен кулланалар.

Шулай ук укыгыз

Барлык яңалыклар