Казанның спорт объектларында 5 ай эчендә сәламәтлекләре чикле 2,5 меңнән артык кеше булган

Йөзү һәм дәвалау физкультурасы иң популяр булып тора.

Фото: Казан шәһәре KZN.RU

(Казан шәһәре KZN.RU, 17-нче гыйнвар, Алинә Бережная). Казан спорт объектларында сәламәтлек мөмкинлекләре чикле өлкәннәр һәм балалар өчен бушлай дәресләр үткәрелүе дәвам итә. Узган елның августыннан әлеге мөмкинлектән сәламәтлек мөмкинлеге чикле булган 2,5 меңнән артык кеше файдаланган.

Дәресләр шәһәрнең 13 спорт объектында йөзү, флорбол, мини-футбол, иппотерапия, дәвалау физкультурасы, хоккей, өстәл теннисы кебек юнәлешләр буенча уза. Йөзү һәм дәвалау физкультурасы иң популяр булып тора. Сәламәтлек мөмкинлекләре чикле кешеләрне спорт учреждениесе хезмәткәрләре тулысынча озата йөри.

Дәресләрдә атнасына якынча 130 кеше була, дип хәбәр иттеләр Казанның Физик культура һәм спорт комитетында.

Казанда сәламәтлек мөмкинлекләре чикле булган кешеләр өчен, шул исәптән коляскадагы инвалидлар өчен 7 спорт объекты тулысынча җайлаштырылган: Идел буе районындагы «Акчарлак» йөзү бассейны, Совет районындагы «Ракета» бассейны, Авиатөзелеш районындагы «Триумф», Яңа Савин районындагы «Ватан» йөзү бассейннары, «Ак бүре», «Спектр» спорт комплексларында һәм Совет районындагы Бокс һәм өстәл теннисы үзәгендәге универсаль спорт заллары.

Объектларның 60%ка якыны начар күрүчеләр өчен җайлаштырылган. Аларда махсус плиткалар урнаштырылган, баскычларда якты ябыштыргычлар, Брайль табличкалары, тактиль күрсәткечләр бар.

Бүгенге көндә барлык муниципаль спорт объектлары начар ишетүчеләр өчен дә җайлаштырылган.

Трибуналы 18 объектның 17 корылмасында сәламәтлек мөмкинлекләре чикле кешеләр өчен трибуналарга керү оештырылган.

Сәламәтлек мөмкинлекләре чикле булган кешеләр өчен дәресләрнең җәдвәле белән сайтта танышырга була.