2021 елда татарстанлылар республика дәүләт хезмәтләре порталы аша 13 миллионнан артык гариза тапшырган

Барыннан да ешрак кулланучылар онлайн рәвештә табибка кабул итүгә язылган

Фото: Марат Мугинов

(Казан шәһәре KZN.RU, 12-нче гыйнвар). 2021 елда Татарстан халкы республика дәүләт хезмәтләре порталы аша 13 млн 698 мең 184 гариза тапшырган. Гомумән алганда, ТР дәүләт хезмәтләре порталы 139 дәүләт һәм муниципаль хезмәте күрсәтә, шуларның 111-е социаль әһәмияткә ия. Узган ел республика халкына 76 шундый хезмәт күрсәтелгән.

Популяр булган топ-3 хезмәт күрсәтүгә түбәндәгеләр кергән: табибка кабул итүгә онлайн язылу (13 млн 153 мең 107 табибка язылу очрагы), балага айлык пособие билгеләү өчен гариза бирү (65 мең 408 гариза), балалар бакчасы өчен ата-аналар түләвенең бер өлешен компенсацияләүне билгеләү (64 мең 970 гариза), дип хәбәр итә «Татмедиа» агентлыгы.

2021 елда яңа сервислар федераль дәүләт хезмәтләре порталында да барлыкка килде. Кулланучыларның хәзер коронавируска каршы вакцинация ясату һәм COVID-19 белән авырганлык турында сертификат алу, югары уку йортына гариза бирү, балалар бакчасына язылу, онлайн режимда укучыларның өлгерешен тикшерү, тору урыны буенча теркәлү, транспорт чарасын теркәү өчен гариза бирү һәм транспорт чарасын теркәү турында таныклыкның цифрлы күчермәсен алу мөмкинлеге бар.

Шуны да билгеләп үтәргә кирәк, быел РФ Дәүләт хезмәтләре порталында тагын йөздән артык яңа сервис барлыкка киләчәк – тиешле карарны 2021 ел ахырында РФ Хөкүмәте рәисе Михаил Мишустин имзалады.

Шулай ук укыгыз

Барлык яңалыклар