Татарстанның меңнән артык гаиләсе ана капиталын балалар бакчасы өчен түләүгә тоткан

Мәктәпкәчә учреждение белән килешү сертификат иясе тарафыннан төзелергә тиеш

Фото: Денис Гордийко

Татарстанның 1043 гаиләсе ана капиталын балалар бакчасы өчен түләүгә тоткан. Бу хакта Россия Социаль фондының ТР буенча бүлекчәсе матбугат хезмәте хәбәр итә.

Мәктәпкәчә программалар буенча белем алуга акчаны дәүләт сертификаты бирелгән бала туганнан соң ук юлларга мөмкин. Ана капиталын кече балага гына түгел, ә балалар бакчасына йөргән өлкән бала өчен дә файдаланырга була. Мәктәпкәчә учреждение белән килешү сертификат иясе тарафыннан төзелергә тиеш.

«Ана капиталы белән дәүләт һәм шәхси балалар бакчалары хезмәтләре өчен түләргә мөмкин, соңгысы хәтта шәхси эшмәкәр буларак теркәлсә дә. Иң мөһиме, мәктәпкәчә оешма Россия территориясендә урнашкан һәм белем бирү буенча хезмәтләр күрсәтү лицензиясенә ия булырга тиеш», – ди Россия Социаль фондының Татарстан буенча бүлекчәсе идарәчесе Эдуард Вафин.

Ата-аналар ана капиталы белән идарә итү турында гаризаны Социаль фондка ведомство сайтындагы шәхси кабинет аша яки клиент хезмәтендә шәхсән, дәүләт хезмәтләре порталы аша яки күпфункцияле үзәктә тапшыра ала. Тулырак мәгълүматны +7(800)100-00-01 телефоны буенча белергә мөмкин.

Шулай ук укыгыз

Барлык яңалыклар