«Ярдәм» хәйрия фонды «Тормыш юлы» социаль акциясен яңадан торгызды

Президент грантлары фонды һәм битараф булмаган кешеләр ярдәмендә ай саен 500-дән артык гаилә азык-төлек ярдәме алачак.

Фото: Денис Гордийко

(Казан шәһәре KZN.RU, 6-нчы октябрь). Октябрь башыннан «Ярдәм» Милли Ислам хәйрия фонды «Тормыш юлы» социаль акциясен яңадан торгызды. Ай саен азык-төлек җыелмаларын социаль ярдәмгә мохтаҗ гаиләләр - аз керемлеләр һәм сәламәтлек мөмкинлекләре чикләнгән кешеләр алачак.

Исегезгә төшерәбез, апрель башында, Татарстанда үзизоляция режимы кертелгәч, «Ярдәм» фонды Казанда «Тормыш юлы» социаль акциясен башлап җибәрде, аның ярдәмендә йөзләгән казанлы, шулай ук дистәләгән чит ил студентлары көн саен ланчбоксларда бушлай кайнар туклану алды. Чикләү чаралары төшерелгәннән соң социаль акция тәмамланыр, дип ниятләнде. Әмма фондлар кул астында тәрбияләнүчеләрнең шактый өлеше ярдәмгә элеккечә үк мохтаҗ булып чыкты, шуңа күрә акцияне дәвам итәргә карар кылдылар.

Президент грантлары фонды ярдәмендә 320 гаилә азык-төлек белән тәэмин ителә. Тагын 200 гаиләгә республиканың битараф булмаган халкы ярдәм күрсәтәчәк, дип хәбәр итә фонд матбугат хезмәте. Моннан тыш, көн саен «Ярдәм» аз керемлеләрне һәм билгеле бер яшәү урыны булмаган кешеләрне кайнар азык белән тәэмин итә - ланчбоксларны аларга фонд хезмәткәрләре һәм волонтерлары китерә.

«Тормыш юлы» акциясендә теләге булган һәркем катнаша ала.

Шулай ук укыгыз

Барлык яңалыклар