Эшсез казанлыларның бушлай өстәмә белем алу мөмкинлеге бар

Программалар шәһәрнең Халыкны эш белән тәэмин итү үзәге тарафыннан оештырылган

Фото: Денис Гордийко

Эшсез казанлыларның бушлай һөнәри яки өстәмә һөнәри белем алу мөмкинлеге бар. Уку-укыту программалары шәһәрнең Халыкны эш белән тәэмин итү үзәге тарафыннан оештырылган.

Бүгенге көндә түбәндәге һөнәрләр буенча төркемнәр ачылган: бухгалтер, 1С операторы, кадрлар буенча менеджер, B, C һәм D категорияле йөртүчеләр, тракторчы, эретеп ябыштыручы, электромонтер, электромонтажчы, программа белән идарә ителә торган станоклар операторы, котельный операторы һ.б. Укуны тәмамлап, йомгаклау аттестациясен узганнан соң, гражданинга квалификациясен раслаучы билгеләнгән үрнәктәге документ тапшырыла. Тулырак мәгълүматны Халыкны эш белән тәэмин итү үзәгенең теркәлү урыны буенча район идарәсендә белергә мөмкин.

Һөнәри белем алуга гаризаны шулай ук «Работа России» порталы аша да бирергә мөмкин. Программа 7 яшькә кадәрге бала тәрбияләүче эшләми торган әниләргә, пенсия алды яшендәге гражданнарга һ.б. туры килә.

Гариза биргәндә татарстанлылар 50 дән артык белгечлек сайлый ала: бухгалтер, кадрлар буенча менеджер, 1С операторы, маркетплейслар буенча белгеч, график дизайнер, ландшафт дизайнеры, логист, программа белән идарә ителә торган станоклар операторы, система администраторы, риелтор, смета төзүче һ.б.

Бушлай укыту «Демография» илкүләм проектының «Мәшгульлеккә ярдәм» федераль проектын гамәлгә ашыру кысаларында үткәрелә.

Шулай ук укыгыз

Барлык яңалыклар