Казанда «Үлемсез полк»: шәһәр билбордларында сугышта катнашучыларның фотолары пәйда булды

Җиңү көненең төп геройлары төшкән конструкцияләрне Горький шоссесында, Җиңү Проспектында, Оренбург трактында һәм башка урамнарда күрергә мөмкин.

Фото: Денис Гордийко

(Казан шәһәре KZN.RU, 9 нчы май). Шәһәрнең 40 билбордында Бөек Ватан сугышында катнашучыларның фотолары пәйда булды. Шул рәвешле Казан быел яңа форматта уза торган «Үлемсез полк» бөтенроссия акциясенә кушылды – теләгән һәркем туганының портретын киемгә, түштамгага, автомобильгә яки сайтка урнаштыра ала иде.

Билбордларда тормышлары Казан белән бәйле булган Бөек Ватан сугышында катнашучылар сурәтләнгән, дип хәбәр итә шәһәр Башкарма комитетының Балалар һәм яшьләр эшләре комитеты. Мәсәлән, портретларда Советлар Союзы Геройлары Борис Кузнецов, Федор Баталов, Максим Дмитриев, ике тапкыр Советлар Союзы Герое булган Николай Столяров һәм башкаларны күрергә мөмкин.

Билбордлар шәһәрнең зур урамнарында һәм магистральләрендә урнашкан: Горький шоссесында, Залесная урамында, Краснокошайск урамында, Ф.Әмирхан урамында, Чистай урамында, Ямашев проспектында, Мамадыш трактында, Җиңү проспектында, Космонавтлар урамында, Оренбург трактында, Р.Зорге урамында, Х.Мәүлетов урамында, Ю.Фучик урамында һ.б.