Казан Кремлендә сәламәтлек мөмкинлекләре чикләнгән кешеләр өчен бушлай экскурсияләр үткәрәчәкләр

Инклюзив программалар 11, 14 һәм 20 нче августка планлаштырылган

Августта «Казан Кремле» музей-тыюлыгында бушлай инклюзив программалар оештыралар. Экскурсияләрне ишетү сәләте бозылган, сукыр һәм начар күрүче шәһәрлеләргә, шулай ук аутистик спектры бозылган балаларга үткәрәчәкләр.

11 августта «Эрмитаж-Казан» үзәгендә, 15:00 сәгатьтә халык «Үз күзләреңә ышанма. Сәнгатьтә иллюзияләр» күргәзмәсенә килә алачак. Килүчеләр экспозиция залларында XVI гасырдан алып ХХ гасыр башына кадәр алдау төрләренең күптөрлелеген күрсәтүче рәсем, графика, скульптура һәм декоратив-гамәли сәнгать эшләнмәләрен күрәчәк. Чарага ишетү сәләте бозылган шәһәрлеләр чакырыла.

14 августта сукыр һәм начар күрүче казанлыларга «Авангард. XXI гасырга – арбада» күргәзмәсе буенча Губерна канцеляриясендә экскурсия уздырачаклар. Килүчеләргә Рәсәй төбәкләре музейлары җыентыкларыннан иртә совет сәнгатенең күренекле вәкилләренең ике йөздән артык әсәре турында сөйләячәкләр. Башлану вакыты: 15:00. Күрү сәләте бозылган казанлылар өчен язма буенча шулай ук «Кремль турында сөйлибез» тактиль макетлары белән күчмә программа үткәрелә.

Музей-тыюлык территориясендә 20 августта 15:00 сәгатьтә аутистик спектры бозылган балалар өчен «Минем Казан Кремле белән беренче танышуым» экскурсиясе узачак.

Экскурсияләрдә урыннар саны чикләнгән. Язылу түбәндәге телефоннар буенча: +7(843)567-81-22, +7(927)722-33-08.

Сәламәтлек мөмкинлеге чикләнгән Татарстан башкаласында яшәүчеләр һәм кунакларга мөстәкыйль сәфәрләр өчен рус ишарәләр телендә һәм тифлокомментарийлар белән видеоэкскурсияләр карарга мөмкин. Көн саен Казан Кремленең визит-үзәгендә һәм музейларында килүчеләргә вакытлыча кресло-коляскалар һәм сенсор рюкзаклар тәкъдим итәләр. Моның өчен үзең белән ташламалар турында таныклык булу, шулай ук шәхесне раслый торган документны залогка калдыру кирәк (паспорт туры килми), дип ачыклык керттеләр ТР Мәдәният министрлыгы матбугат хезмәтендә.

Шулай ук укыгыз

Барлык яңалыклар