Берлин биючесе Аднан Душаку: «Мин Казанга гашыйк булдым. Миңа бу шәһәрнең вайбы ошады»

Хәзер ТР башкаласында брейкинг һәм урам сәнгате буенча 15 нче COMBOnation турниры уза

Фото: bezformata.ru

(Казан шәһәре KZN.RU, 25 нче август). Брейкинг һәм урам сәнгате буенча 15 нче COMBOnation турнирына Берлиннан биюче Аднан Душаку килде. Аны бу чарага судья сыйфатында чакырганнар. KZN.RU порталы брейкердан бию белән ничек шөгыльләнә башлавын, брейкингның яшьләргә нәрсә бирүен һәм Казан анда нинди тәэсирләр калдыруын сорашты.

Сез ничек бии башладыгыз? Сезне моңа нәрсә этәрде?

Сигез яшемдә бии башладым. Биюгә мине олы абыем алып килде, башта без өйдә шөгыльләнә идек. Беренче тапкыр мин Роболекс биюендә брейкингны үз күзләрем белән күрдем. Ул текә хәрәкәтләр ясады, башында әйләнде. Мин моны кабатларга һәм өйрәнергә теләдем. 1999 елда бии башлаганда, Америкадан Кул Джо кебек көчле егетләр бар иде, ул хәтта Run-D.M.C. төркеменең клибында да уйный һәм шундый көчле хәрәкәтләр ясый иде. Бу мине рухландырды. Мин дә әлеге сәнгатьнең өлеше булырга теләдем.

Бүген бию – яшьләр мәдәнияте элементларының берсе. Сез ничек уйлыйсыз, бию һәм брейкинг яшьләргә ни бирә? Ни өчен нәкъ менә аларга игътибар итәргә кирәк?

Хип-хоп хәзер яшьләр арасында бик популяр, ул ритмиклык, атлетика һәм креативлык үстерү мөмкинлеге бирә. Әгәр дә син үзеңне хип-хопның бер өлеше дип саныйсың икән, тормышың яктырак, тулырак була, син үз тәнең аша шәхесеңне күрсәтергә телисең. Мин күнегүләр ясый башлагач, барысын да булдыра алырмын дип ышандым. Башка беркем дә булдыра алмаганча хәрәкәт итү – бу сәнгатьнең бер өлеше. Бу тормышка көч һәм ышаныч бирә, максатка ирешергә булыша. Бу миңа бию белән бирелүенә ышанам – әлеге энергия миңа тормышта көч бирде.

COMBOnation турниры турында үз тәэсирләрегез белән уртаклашыгыз. Сезгә Казан ошыймы?

Быел COMBOnation чарасының 15 нче юбилей елы, әлеге чор дәвамында биредә бик күп кеше катнашты. Бу чара мине һәрвакыт яңа талантлары, яңа тәэсирләре, текә музыкасы белән гаҗәпләндерә. Әлеге чараның бер өлеше булуыма, тәҗрибәмне уртаклашуыма, кешеләрне рухландыруыма шатмын. Мин инде 24 ел биим, хәзер яңа катнашучылар мине рухландыра.

Мин Казанга гашыйк булдым, монда кешеләр тату мөнәсәбәттә яши – мөселманнар, христианнар, барысы да бик дус. Миңа әлеге шәһәрнең вайбы ошады, биредә бик күп иҗади кешеләр, биючеләр бар. Тизрәк кире кайтуымны көтәм.

Исегезгә төшерәбез, COMBOnation турниры 24-27 нче август көннәрендә шәһәрнең сигез локациясендә уза – брейкинг буенча финалларны «УРАМ» экстрим-паркында оештыралар. Теләге булган һәркем тамашачы була ала. Турнир кунакларын бушлай бию осталык дәресләре, күрсәткеч чыгышлар, граффити-баттллар, бию культурасы легендалары белән очрашулар көтә. Моннан тыш, бөтен Россиядән 20 дән артык граффити артисты бер мәйданчыкта җыелачак. Иҗатчыларның эшен 25 нче августта – Алафузов фабрикасында, 26 нчы августта – «Ща» бар ишегалдында һәм 27 нче августта «УРАМ» экстрим-паркында күзәтергә мөмкин булачак.

Шулай ук укыгыз

Барлык яңалыклар