«Казан» бию ансамбле беренче тапкыр «Без – Россия» гастроль программасында катнашачак

17-23 нче апрельдә артистлар Төньяк Кавказ шәһәрләрендә чыгыш ясаячак

Фото: vk.com/showballetkazan

«Казан» бию ансамбле беренче тапкыр «Без – Россия» гастроль программасында катнашачак. 17-23 нче апрельдә артистлар Төньяк Кавказ шәһәрләрендә үз номерларын тәкъдим итәчәк, алар арасында Махачкала, Дербент, Грозный, Нальчик, Владикавказ һәм башкалар бар.

Ансамбль «Йөрәкләрне яулый торган тамаша» программасы белән чыгыш ясаячак. Ул төрле мәдәниятләр һәм милләтләр турында сөйләүче бию этюдларыннан тора. Ансамбльнең сәнгать җитәкчесе – ТР халык артисты Чулпан Закирова.

Шәһәр Башкарма комитетының мәдәният идарәсендә хәбәр итүләренчә, чыгышлар бөтенроссия гастроль-концерт планы кысаларында узачак. Ул илнең бөтен территориясендә гамәлгә ашырыла, шул ук вакытта мәдәни киңлекне формалаштыруга һәм берләштерүгә, Россиядәге һәм якын чит илләрдәге тамашачыларны җәлеп итүгә ярдәм итә.

План ике федераль программаны үз эченә ала – «Зур гастрольләр» (театр гастрольләре) һәм «Без – Россия» (милли коллективлар гастрольләре). Соңгысы Россия Мәдәният министрлыгы инициативасы белән 2020 елда гамәлгә ашырыла башлады. Программалар ерак шәһәрләрдә яшәүче тамашачыларга Россия һәм рус чит ил театрларының иң яхшы спектакльләрен, күренекле коллективларның концертларын тамаша кылу мөмкинлеге бирә. Мәсәлән, 2023 елда Россиянең 89 төбәгендә 277 театр һәм 66 коллективның гастрольләре узган, 2474 спектакль һәм концерт күрсәтелгән.

Шулай ук укыгыз

Барлык яңалыклар