Андрей Егоров: «Водоканал»ның барлык объектлары да җылылык җибәрүгә әзер»

Җылылык сезонына предприятиедә 4 км челтәр алыштырылган, 600 коега ремонт ясалган һәм 300 дән артык янгын гидранты алыштырылган

Фото: Марат Мөгыйнов

(Казан шәһәре KZN.RU, 19 нчы сентябрь, Диана Жиленкова). «Водоканал» муниципаль унитар предприятиесенең барлык объектлары да җылылык җибәрүгә әзер. Кирәкле эшләр – җылылык белән тәэмин итү системаларын юдырту һәм пресслау, җылылык энергиясен исәпкә алу үзәкләрен тикшерү, һава торышына карап көйли торган төеннәрне һәм җылылык пунктларын ревизияләү – тулысынча башкарылган. Бу хакта предприятиенең генераль директоры Андрей Егоров ТР Министрлар Кабинетында узган брифингта хәбәр итте.

Казанны җылылык белән тәэмин итү чыганаклары җылылык чорында өзлексез эшләү өчен су белән тәэмин ителгән. Предприятие хезмәткәрләре 4 км челтәрне күчергән, су белән тәэмин итү челтәрләрендә 180 берәмлек бик-көйләү арматурасын һәм 300 дән артык янгын гидрантын алыштырганнар, 600 су үткәргеч һәм канализация коесын ремонтлаганнар, 100 км озынлыктагы канализация челтәрләрен юдырганнар. Барлык объектларга да җылыту сезонына әзерлек паспортлары алынган.

«Шәһәрдә җылылык бирү чорында объектларны су белән тәэмин итү чыганакларыннан сүндерү белән бәйле планлы эшләр башкарылмаячак», – дип ышандырды Андрей Егоров.

Предприятиенең өстәмә инвестиция программасын гамәлгә ашыру кысаларында Ломжа, Халитов, Толстой, Гадел Кутуй, Зеленая урамнары буенча гомуми озынлыгы 3 км озынлыктагы су үткәргечләр төзекләндерелгән. Нәтиҗәдә – 150 мең кеше су белән тәэмин ителгән.

Чистай урамындагы һәм Ямашев проспектындагы өченче төньяк коллекторның 1600 чакрым озынлыктагы ике участогын реконструкцияләү буенча 1000 мм дан 2000 мм га кадәр диаметрлы эшләре төгәлләнгән. Шәһәрнең Яңа Савин һәм Совет районнарының 200 меңнән артык кешесе өчен су бүлеп бирү системасының ышанычлылыгы арткан.

Гадел Кутуй, Патрис Лумумба, Академик Парин урамнары һәм башка гомуми озынлыгы 4 мең метрдан артык булган суүткәргечләрне реконструкцияләү эшләре алып барыла.

Ф.Әмирхан урамындагы 700 м озынлыктагы өченче төньяк коллекторда эшләр дәвам итә. «Якын арада Мәүлетов, Бертуган Касыймовлар, Коновалов, Себер тракты һ.б. урамнарда су юлларын реконструкцияләүгә керешәбез. Быел 18 км озынлыкта су торбаларын һәм 3 км озынлыктагы канализация коллекторларын реконструкцияләү планлаштырыла», - дип йомгаклады спикер.

Казанда урамдагы һаваның уртача тәүлеклек температурасы 5 көн дәвамында 8 градуста торса, җылылык бирү сезоны игълан ителәчәк. Шәһәрнең мәгариф һәм медицина учреждениеләре – 635 мәктәп һәм балалар бакчасы, 116 сәламәтлек саклау объекты инде җылылык җибәрүгә әзер. Социаль объектларга җылылык бирү ихтыяҗ булса иртәрәк башланачак.

Шулай ук укыгыз

Барлык яңалыклар